【年尾盤點】邊位藝人彈出 邊個被雪藏?

娛樂圈同股市一樣,有上有落,有唔少歌手演員,今年憑著佢哋努力而成功彈出被觀眾愛戴;亦有一啲藝人被公司雪藏甚至被炒魷魚,今日就同大家重溫一下。

彈出系列

ToNick

樂隊ToNick成軍已經十年,不過冇留意開香港band界嘅網民,應該對佢哋有啲陌生。ToNick作品經常抽時事水,夠晒親民貼地。今年佢地除咗夾Band出Show,又做埋節目主持,主音恆仔更執導電影《救殭清道夫》,唱埋主題曲《長相廝守》。呢首歌大受歡迎,網上點擊率超過7百萬次,早前已經憑呢首歌喺港台十大中文金曲得獎,亦成功躋身「叱咤樂壇我最喜愛的歌曲」最後5強。

譚芷昀 Celine

9歲嘅小巨肺Celine妹妹譚芷昀,今年參加《全美一叮》,年紀輕輕但唱功了得,獲評判按下「Golden Buzzer」直送下一圈。雖然她十強止步,無緣晉身總決賽,但仍然得到不少人賞識。

菊梓喬

由於吳若希今年暫別樂壇專心生女湊B,星夢娛樂立即安排新人菊梓喬Hana唱一系列嘅劇集歌,日播夜播嘅「洗腦歌」令佢人氣急升,火速獲得佳績。

江嘉敏

江嘉敏喺《親親我好媽》中飾演江美儀大女Venus,憑著樣子甜美、青澀不做作而深受觀眾歡迎,成為連阿媽都識嘅宅男女神。

張建聲

張建聲入行六年,主力拍電影,裸跑床戲增肥試過晒,直到今年拍網劇《反黑》靠「招積」一角演技終被肯定。雖然佢拍《反黑》時壓力大到要睇精神科,但帶挈佢片約不絕,仲有機會同周潤發、郭富城合作拍戲。

袁文傑

《不懂撒嬌的女人》中飾演大老闆游生嘅袁文傑,唔少觀眾大讚佢有型靚仔有身型,觀眾覺得佢留咗係亞視咁多年,簡直浪費時間。

何廣沛

何廣沛憑《親親我好媽》同《超時空男臣》成功入屋,成為人氣小鮮肉。入行五年嘅何廣沛扮咩似咩,扮太監十入型入格,可塑性認真高。

胡鴻鈞

之前主力音樂成績平平,不過勝在有TVB咁大個靠山,憑《降魔的》石敢當一角成功入屋。加上同門嘅許廷鏗今年轉會,集中火力谷起Hubert,今年叱咤5強,佢喺歌曲同男歌手兩瓣都打入五強。

邊個被雪藏或被炒?

鄭俊弘&何雁詩

 

鄭俊弘年頭被爆出一腳踏兩船,背住正印女朋友同何雁詩搞三角戀,立即形象插水,不但被封為「世紀賤男」,Fred同「 好勝小三」何雁詩仲遭到公司雪藏。雖然佢地都否認被打入「冷宮」,但事實上無論曝光率及工作量都急劇下降。

張繼聰

張繼聰接拍嘅無綫劇一部接一部,台慶劇《誇世代》亦熱播中,本來形勢大好。但有傳張繼聰因經理人公司老闆蕭定一與無綫因佘詩曼拍攝電影版《十月初五的月光》超時補水問題而打官司,連累阿聰因此被封殺。

李潤庭

前《東張西望》主播李潤庭去年12月被揭背妻出軌,偷食有夫之婦,形象盡毀。無綫將佢雪藏咗4個月就解凍。點知復職無耐,今年7月又被爆根本冇同Tiffany斬纜,有傳因佢再度偷食,俾高層余詠珊下令怒炒。