【年尾盤點】2017娛樂圈喜事重重之結婚篇

2017年成個娛樂圈喜氣洋溢!由年頭到年尾,都傳出好多藝人結婚生仔嘅好消息,而家就說同大家數下今年娛樂圈有邊啲藝人結婚啦!

余文樂與王棠云

余文樂入行17年,緋聞女友一大堆,有唐詩詠、盧巧音、 黃伊汶、吳雨霏,上年就傳出佢同皮帶大王千金王棠云蜜運中。估唔到今年12月5日,余文樂突然上載佢同王棠云喺澳洲墨爾本舉行婚禮嘅相,更有傳王棠云已經陀住BB,呢個消息真係震驚中港台娛樂圈。

陳嘉寶與黃頌祈

陳嘉寶同滑水健將黃頌祈於11月25日結婚,由於男友屋企人都住喺長洲,所以Anjaylia都係長洲出嫁,排場非常誇張。而姊妹團由圈中好友陳凱琳、陳瀅、蔡穎恩、組合Super Girls成員吳嘉熙(Cheronna)等組成。

吳若希與Alex Ho

吳若希喺年頭生咗女兒Giselle後,大家都估佢同Alex幾時會正式成為夫婦。佢地終於揀咗10月10日呢個十全十美嘅日子,正式簽字結婚。

郭富城與方媛

舞王郭富城同熊黛林拍拖多年,如今佢地各自修成正果。郭富城同細22歲嘅內地網紅女友方媛於4月18日拉埋天窗,於半島酒店筵開10席,只邀請親朋好友,相當低調。郭富城仲喺9月迎接愛女Chant出世,雙喜臨門。

林奕匡與李靄璣

林奕匡同拍拖10年嘅女友李靄璣,喺8月29日返到佢地相識相愛嘅加拿大溫哥華舉行婚禮。Phil特別㨂左母校UBC(英屬哥倫比亞大學)內一間過百年歷史古宅做婚禮場地。姊妹團搵咗張名雅、鄧佩儀及黃美棋等。

鄧健泓與石詠莉

43歲嘅鄧健泓同女友石詠莉雖然年紀相距13年,但拍拖5年以來一直愛得非常甜蜜。自去年3月同石詠莉求婚成功後,終於落實今年12月底喺香港註冊及舉行婚禮。

鄧達智與陳梓欣

著名時裝設計師鄧達智(William),於9月9日與拍拖一年、任職醫生嘅男友陳梓欣結婚。由於鄧達智係新界屏山鄧氏後人,與同性結婚需放棄阿爺傳下來嘅房地產和田地,保守估計值千萬港元。

王君馨與Daniel

「處女黨」成員之一嘅王君馨於2016年宣布與拍拖12年嘅圈外男友Daniel簽紙結婚,並於兩人拍拖紀念日7月11日喺美國行禮。仲請咗鍾嘉欣,李亞男、茍芸慧、岑麗香、衛蘭、裕美等擔任姊妹團。

安志杰與Jessica C.

Jessica C.於2016年為安志杰誕下女兒Tessa,不過一直都未有時間行禮。直到今年10月15日於夏威夷正式結婚,早前又宣佈再懷第二胎。

孫耀威與陳美詩

44歲嘅孫耀威同和36歲嘅陳美詩拍拖8年,兩人經常被外界追問結婚計劃,但一直都低調回應。直至本年5月2日終於承認喺美國註冊結婚,亦於7月29日喺堅尼地道佑寧堂舉行婚禮。

其實今年結婚嘅藝人又點止以上呢十位,計計埋埋差唔多有20對娛圈人喺今年拉埋天窗,真係恭喜晒你哋呀!