【年初低調離巢無綫】 古明華急性膽囊發炎做手術:更珍惜身邊人

ViuTV Facebook 影片截圖

古明華憑無綫劇集《巴不得媽媽》飾演「蘇基」一角爆紅,自從喺《萬千星輝頒獎典禮2012》獲得「最佳男配角」獎項之後,喺無綫雖然繼續參與唔少劇集,不過就未再有任何代表作,更要靠兼職配音員賺錢養家。喺今年一月底,佢就低調離開效力26年嘅無綫向外闖,原因係由於女兒開始讀大學,而且由十歲開始就有長期病患、太太又曾經患病,屋企多咗唔少開支,所以希望可以北上發展搵多啲錢養家,真係絕世好爸爸。

ViuTV Facebook 影片截圖

而近日古明華就同ViuTV合作做真人騷《中佬唔易做》將於6月4日開始播出,其實除咗佢之外,仲有張松枝、袁富華、麥長青、敖嘉年及艾威,佢哋將會喺節目中體驗轉行打工嘅滋味。喺噚日,佢哋就齊齊出席記者會,而古明華嘅身型瘦削咗唔少,佢喺心意卡上寫上「熱愛生命、熱愛生活」嘅時候亦非常感觸。古明華透露,原來四月初開工前夕,佢因為急性膽囊發炎而要即時送院開刀,最後要將成個膽囊切去,縫咗11針,要休息三個禮拜,令到拍攝計劃受到影響。不過好彩有其他中佬可以頂到佢個檔期,最後先順利完成拍攝。

呢位勤奮嘅好爸爸本身患有糖尿病,仲曾經因為肺感染而住咗3個月醫院。再加上老婆同囡囡身體亦唔好,屋企負擔一定好大。但係古明華就表示亦因為咁令佢面對逆境嘅時候都會活在當下、珍惜身邊人。所以接受傳媒訪問嘅時候,古明華就話呢個病令佢最深感受嘅唔係自己可唔可以繼續生活,而係要好實在同好開心咁熱愛生命同埋身邊嘅人,唔好淨係專注喺痛苦或難題上面,因為呢啲嘢係人生一定要面對嘅事,只係睇你同咩人一齊去經歷。古明華就認為無論佢拎獎或者病都要同家人一齊,因為咁樣先係最重要。