《巨輪ll》未播就被劣評 究竟衰啲咩?

由蕭正楠丶田蕊妮丶陳凱琳主演嘅《巨輪ll》緊接《超能老豆》捧喺今晚播出。新一輯主要講述羅威信(蕭正楠飾)及姚文英(倀雞英)(田蕊妮飾)努力經營嘅「羅信記」發展成功,但係惹來地產商高天鷲(吳岱融飾)不滿兼打壓,更被人出賣,於是羅威信去日本沖繩尋找寧靜空間,期間認識兼戀上高伊娜(陳凱琳飾)。淨係講到呢到班網民似乎唔係好buy,未播已經被劣評原因係:

1. 鍾嘉欣陳展鵬淪為客串
聲稱劇集以原班人馬延續上集劇情,但係深受觀眾喜愛嘅喬天生(陳展鵬飾)同卓靜(鍾嘉欣飾)只會喺頭5集出現。鍾嘉欣陳展鵬淪為客串,唔少網民得知消息後都話只會睇頭5集,冇佢哋想睇嘅意欲已經大減,仲話難為咗陳展鵬,因為不停出現喺早前播出嘅製作特輯為套劇做宣傳。

2. 又係你呀陳凱琳
自從當選後,陳凱琳(Grace)一直受到無綫重用,喺多部劇集中擔演主角,仲要一套接一套。唔知係唔係出鏡機會太高,加上演技被評太造作、瘋狂無故尖叫、扮可愛等等,已經令觀眾覺得煩厭同反感。對於又就嚟見到Grace,唔少網民已經揚言罷睇。同埋基於劇情需要,Grace係需要講少少日文及裸泳,網民已經講明係佢另一扮嘢嚇走觀眾之作。

其實劇集今晚就出街,各位網民可以睇咗先俾評分,可能有驚喜呢?!