工藤佑采心急搣脂操波唔黑面

東方日報
工藤希望回復選美時的身段,再復出幕前。

去年落選港姐工藤佑采,因「黑面跳舞」成名,落選後銷聲匿迹。近日她逐步公開露面,無奈身材發福,故請來猛人「陪操」,為復出鋪路!

現年26歲的工藤佑采,去年參選港姐12強止步後,重操OL故業。近日「復出」亮相ViuTV節目的她,身材比選美時略為圓潤,據知她最近頻頻運動操Fit,早前見她現身北角運動場,與同行一男一女打羽毛球,原來男的是國家羽毛球初級教練,女的則是中銀紫荊盃最佳女運動員,有兩位猛人陪練波,認真巴閉!

心郁拍戲做網紅

工藤先與女教練合作拉筋熱身,落場後,見她球技認真麻麻,手腳生硬,多次追不上球。男教練對她握拍的動作甚為嚴謹,指點一輪後,工藤接球明顯有進步。她又被安排與女教練一前一後接波,練習約半小時後,見其球技突飛猛進,成功殺波後更罕有露出笑容!

事後聯絡工藤,問到請兩位教練陪打,是否急於操Fit復出?她承認現時身形未夠Firm,希望回復選美時的狀態:「嗰位伍Sir係我朋友,之前唔知佢教打波,最近想試吓運動就搵佢,佢免費教我,仲帶埋女助教。我主要想改善手腳唔協調,最初發覺自己唔協調,係唔可以邊唱歌邊跳舞,淨係唱歌就得,夾埋一齊就難。(準備復出?)我都想試吓拍戲做主持,依家有拍片放喺微博,亦有傾過做內地網紅。」

談及因「黑面」成名,她完全不介意,更自嘲:「黑面幾好,我唔講嘢就黑面,咁多年冇乜所謂,外國都好多唔同類型藝人,唔一定個個好甜美,可能Fans鍾意我黑面。」至於會否再戰選美舞台,她笑言可能性不大,自嘲年紀大,但有朋友鼓勵她參加中國小姐選舉。

打到論論盡盡,「黑面神」工藤都忍唔住笑。
教練捉住手,教工藤正確的握拍手勢。
工藤在女教練協助下拉筋,有啲硬喎!