工人姐姐疑因避債突請辭 孫慧雪慘收追債電話恐嚇信

孫慧雪

現年37歲嘅孫慧雪(阿雪),喺2016年與圈外男友結婚,之後更誕下囝囝Riley,雖然佢已經升呢成為人妻兼人母,唔少宅男仍然繼續視佢為女神。婚後佢都有繼續幕前演出,既然有唔少工作在身,屋企請家傭做家務同幫手照顧囝囝都好正常,不過近日佢嘅工人姐姐疑因避債而突然請辭,搞到阿雪完全不知所措。

喺噚晚,阿雪就喺社交網站上載一張財務公司追債信嘅圖片,並留言話:「我工人姐姐突然請辭,話要返鄉下,我想請佢幫多幾日手都唔肯,喺佢一走咗之後,追債電話就打嚟,又收恐嚇信,即刻明晒點解對佢咁好都要走,我之前仲猛咁諗,係咪辛苦咗佢!佢之前話有困難,我哋仲借咗筆錢俾佢!唉!佢明知我哋屋企有小朋友都咁樣,真係好過份~可以點解決😩#人善被人欺 #點解我成日遇到呢啲嘢 #所以呢個星期都由我親自照顧小朋友 #都幾好」

孫慧雪 Facebook

唔少網民知道後都紛紛留言叫佢加油同提供方法,例如「可以將封信入返信封,用膠紙封返埋,再係信面頭寫"無此人",放回大廈退信籃俾郵差收返」、「先報警備案,之後再注動聯絡入境處此傭工姐姐因在街外借錢無還而辭職。最後要聯絡追數公司此工人姐姐已因私人理由離職!我媽媽之前請嘅菲律賓工人姐姐都係出街借錢後辭職!」及「向財務公司詳細解釋……並徵求律師意見……」等等。

孫慧雪
孫慧雪
孫慧雪