崔碧珈被辱「係咪有病」 匿埋爆喊

東方日報
戴上追蹤手帶的崔碧珈,甫落機即大呻慘況。

藝人崔碧珈(Anita)昨日從美國返港,甫落機即大吐苦水,指當地排華情況嚴重,留美期間,遭到不少無禮對待,言詞尖酸刻薄,令她感到萬分委屈,更曾為此在家喪喊!回港後,她會在酒店隔離14日,並已計劃好一連串「工作」,包括一人分飾四角拍防疫短片,更直言自己「細膽」,絕不會偷走離開酒店!

Anita昨晨由美國飛抵香港,戴上口罩、眼鏡及帽子,右手佩戴追蹤手帶的她步出機場,並向傳媒展示政府文件袋,內有家居檢疫的相關文件。她接受訪問時稱,於回港十六小時的機程中,她只去了一次洗手間,全程沒有進食,只用飲管飲水,問到機上情況?她說:「架機唔算好滿,大約坐咗六、七成,不過我隔籬都有人坐,機上嘅人都戴晒口罩同着咗雨褸,我只係搵到手套,仲係廚房用嘅手套。(坐飛機好大壓力?)唔大壓力,做好自己防疫就得,我上到機有抹晒啲嘢,又用消毒液當香水咁噴。」

新冠肺炎在美國的疫情加劇,確診數字已破萬,Anita坦言在當地反而更驚,因美國排華情緒相當嚴重:「自從特朗普公布咗防疫措施後,明顯感受到排華氣氛,我喺當地健身同搭車,有啲人對我講啲唔禮貌嘅嘢同埋唔友善嘅眼神,有人會話『你係咪有病,唔好傳染我』,又話講到病毒,問我最清楚。(覺得難受?)都會。我以前喺外國都冇覺得種族歧視,所以今次感覺係唔開心。我返嚟香港前幾日都忍唔住喺屋企喊,見到啲人排隊買槍嘅新聞,個氣氛好唔好。我張回程機票本來係下星期,媽咪好擔心我,所以改早咗,嗰邊好危險,怕有爆竊同搶劫,而且我住荷里活嗰邊治安唔係咁好。」她指海關檢疫時間不算長,只需遞交表格及會抽樣量度體溫。

酒店隔離唔會偷走

由於Anita在港跟母親及弟弟居住,為安全起見,她回港後會搬到酒店隔離,她指隔離的14日,酒店不會提供餐飲及執房服務:「我用過嘅毛巾都會銷毀,所以要媽咪煲湯同煮三餐畀我,要辛苦媽咪。(有冇影響工作?)呢段時間我原本喺美國拍廣告同劇,但都取消咗,所以唔返香港都冇嘢做。」

受訪後,Anita推着行李到達停車場,崔媽媽早已在停車場等候,但她就未有戴上口罩,問她見到女兒回來是否安樂晒?崔媽媽笑着說:「係。」然後揸車送女兒到尖沙咀入住酒店,辦理入住手續後,問Anita會否擔心酒店裏會遇到不友善的眼光?她說:「應該唔會,之前(外國)感受太多,香港會好啲,但都驚(酒店)唔接受,但頭先填咗健康紀錄同有量體溫,所以都OK。」講到身處鬧市,可會想偷走?她笑說:「絕對唔會,我細膽,會奉公守法,有條手帶會知你去邊。」

閉關照「開工」

她一去到酒店當然是沖番個靚涼,至於這段隔離的日子,她已計劃好一連串「工作」,崔媽媽亦帶了瑜伽墊、電子琴及啞鈴給女兒打發時間,Anita說:「呢14日會每日練琴、做運動繼續保持狀態,因為隔離完之後要拍廣告。另外,美國個動作教練畀咗啲功課我,我會喺房度自己練體操動作。」此外,她還計劃一個人分飾四角拍短片:「我會拍一條短片關於《防疫Tips》,所以,今日要寫吓個短片劇本,度個通告單,因為冇人幫我拍,自己one man band,我會一人分飾4角,包括老人家同細路仔等等。」

崔媽媽前來接機,與女兒齊齊搬行李,再送女兒到酒店。
Anita攞住行李入住酒店隔離,還帶備了電子琴、瑜伽墊及啞鈴。