岑麗香「過濾」名店專攻減價貨

東方日報
香香戴黑超遮掩素顏。

岑麗香為了囝囝日後升學,最近舉家搬到港島區半山豪宅居住。開支龐大的她慳住使,日前現身中環時,途經名店亦過門不入,反而到大眾化時裝店專攻減價貨,精挑細選下只買了一件襯衣,勒緊荷包!

藝人岑麗香之前與男友強強(Joshua)在溫哥華拉埋天窗,Joshua為老婆來港發展事業,而香香今年3月誕下寶貝仔Jacob,一家三口幸福滿瀉。香香最近已為現時約8個月大的兒子鋪路入名校,舉家由將軍澳搬到位於干德道逾2,000萬元的豪宅!

左揀右揀慳荷包

向來慳家的香香進駐半山後開支隨時一闊三大,難怪慳得就慳,日前撇下兒子現身中環行街時,亦極為忍手!當日下午4時許,香香戴黑超遮掩素顏,穿長袖衫襯貼身牛仔褲,挽着手袋在該處商場行逛,途經名店亦只望一望就離開。她沿途邊行邊撳電話,行過一間平民化時裝店時,被門外的減價牌「Sale」吸引,隨即入店選購,見她揀完飾物再睇秋冬服裝,不時睇價錢牌研究,但左揀右揀統統放下,改為轉攻100元有找的減價襯衣,未幾已買到心頭好!

入舖只掃平貨,慳住使!
進駐半山使費大,難怪香香行過名店都係望吓就算。