岑麗香露背傾湊仔經 有意母子檔拍廣告

幸福真係要晒出嚟。

藝人岑麗香穿露背裝出席「"Mick" the Holidays Bright」新春企劃揭幕禮,又與卡通人物一同合照。她透露昨日才從加拿大回來,去了兩星期,都是近日才決定農曆新年會留港一家人過:「阿仔第一次過新年,我都好期待,佢依家9個半月大,到時一家人可以襯新衫。(會着家庭裝?)係呀。(着中式衫?)想呀,因為我細個爹哋媽咪都有幫我買呢啲衫,覺得好得意,大個可以睇番啲相。」她又笑言到時囝囝可以𢭃多些利是:「我畀多啲,佢就𢭃多啲。」

有諗母子檔拍廣告

講到工作,她表示現時拍緊戲,而二月底就會拍無綫劇《BB來了2》(暫名),笑言:「我依家有9個幾月湊B經驗,希望可以幫到拍劇,因為同小朋友拍戲係好難,希望到時可以順利啲。」問到可會帶埋囝囝去拍劇?她表示:「未必,但有機會都想帶佢睇吓媽咪唔喺屋企做咩,同佢影吓相。(套劇畀埋佢出鏡?)諗吓先,我要慢慢思考吓先,因為做幕前唔容易,要同老公傾吓先。」問到現時可有人邀請母子檔拍廣告?她表示:「交畀公司搞,初頭比較保守,但愈望佢愈得意,想同大家分享吓,同埋有個紀念。」

煩拍劇唔知點見阿仔

問到之後拍劇時間長可會很掛住囝囝?她笑言:「唔敢諗住,有時出去做陣嘢都已經好唔捨得,到時拍劇都唔知點處理。(會唔會要求工時唔好咁長?)冇特別要求,惟有同屋企人同佢Facetime,佢都識睇嘅。」而講到好友朱千雪有傳懷孕,她表示:「近排冇見,唔知佢有冇BB,因為呢排我飛得多,所以冇乜機會傾到咁深入,真係唔知。」