就快公佈台慶劇名單 有冇邊套係你心水?

每年11月就係台慶月,無綫都會選擇一啲大製作及大卡士嘅劇集做台慶劇,相信無綫好快就會有所公布,唔知下面邊一套會係你心目中真正嘅台慶劇呢?

《解決師》

劇集講述少年Karson(王浩信飾)為母親被後父虐死,而找後父報仇。後來成為一個「當黑幫也解決不了問題的解決師」。輾轉Karson成為一個體育老師改名Orson,亦因此認識了黑幫千金Jovy(唐詩詠飾)。Orson亦因為保護Jovy而再次踏上舊路,同一時間Orson結識了〇記高級督察Man Sir(張穎康飾),之後Man Sir踏上黑警之路,因而成為Orson同Man Sir嘅對決。以警匪「無間道」作主線,香港同澳洲嘅黑幫博弈,又係幾吸引嘅。劇集有力捧小生王浩信及新一代女神張曦雯,《解決師》絕對係台慶劇熱門之一。

《殺手》

劇集演員卡士陣容強大,有黎耀祥、陳豪、李佳芯、龔嘉欣、江美儀、高海寧、麥明詩、鄭子誠、謝東閔、李成昌、馬海倫及江嘉敏,淨係呢堆名已經好似台慶劇啦!《殺手》講述閰武(黎耀祥飾)過氣墮落「殺手之王」,喬星(陳豪飾)當今神級殺手。因緣際會之下對付共同敵人,但到最後二人卻要變成「生死對決」。用殺手做主題嘅劇集本身已經不多,有一定嘅新鮮感同吸引力,而且演員陣容亦值得期待。

《黃金有罪》

70 及80年代都可以話係香港嘅「黃金時代」。《黃金有罪》講述榮木桐(張兆輝飾)喺香港嘅「黃金時代」以不擇手段成為巨富嘅故事。其他演員仲有蕭正楠、姚子羚、黃智賢、㓋永城及何廣沛等等。大家睇劇之餘,又可以重溫下香港嘅「黃金年代」。

《極度怪咖》

《極度怪咖》由王浩信、張掁朗、湯怡及蔣家旻等主演,講述蔣世龍(王浩信飾)與高彬(張掁朗飾)係警方臥底,呢兩個臥底相遇之後嘅故事,不過最近呢個題材好似有啲敏感咗喎!唔通真係關「地獄黑仔王」張振朗事?

《致所有愛過的人》

由林文龍率領一眾年青新勢力嘅《致所有愛過的人》,有黃翠如、連詩雅、陳自瑤等靚女坐陣,都幾有新鮮感。而「博士」馬貫東就飾演一位專科醫生,同連詩雅喺劇中係一對醫生情侶。新鮮感就真係十足十,但小品劇要成為台慶劇又真係有少少難度。

《十八年後的終極告白》

懸疑劇《十八年後的終極告白》講述幾名少年爭執之後,其中一名少年意外死去,其他少年為咗掩飾真相將屍體埋藏,但18年後屍體被意外發現。負責調查警員阮麗瑾(黃智雯飾),父親阮進(林嘉華飾)竟然就是當年死去少年的父親。另外,當時其中一名少年林朗生(譚俊彥飾)有同時戀上阮麗瑾,令到事情錯綜複雜。真正嘅兇手我創意黑暗,欲將揭露真相嘅人一一殺害。雖然演員陣容唔算強大,仲有被網民指係「收視毒藥」嘅譚俊彥主演,但懸疑劇嘅吸引力有時真係估佢唔到!

《唐人街》

由《城寨英雄》原班人馬演出,再度合作新劇《唐人街》講述華人到泰國打拼嘅故事為骨幹。有《城寨英雄》在前,劇集有一定保證,但會唔會擺脫唔到《城寨英雄》嘅影子呢?順帶一提,此劇為已過世嘅甘草演員「梁舜燕」嘅遺作,如果可以作為台慶劇的話,都可以話係對呢位甘草演員嘅致敬!

《法證先鋒IV》

大熱門《法證先鋒IV》就因為「安心事件」搞到要重新拍攝黃心穎嘅戲份,而不久前才宣布補拍完成,如果想趕及成為台慶劇,後期製作人員就要加倍努力啦!

《降魔的2.0》

《降魔的2.0》加入咗鄧佩儀及麥凱程等等,而C君就飾演一隻鹹濕鬼,譚凱琪就加入爭奪小馬(馬國明飾)嘅混戰之中。上一輯嘅石敢當(胡鴻鈞飾)就完成任務啦,今集胡鴻鈞叫做「豪仔」,而啤啤(劉佩玥飾)喺上一輯應該死咗,不過今輯佢會再出現,成為「爭奪」小馬嘅一份子。不過如果《降魔的2》能夠成為台慶劇,「安心事件」受害者馬國明應該攞到好多同情分!

《機場特警》

《機場特警》由張振朗、楊明及蔡思貝主演,內容都係以一班新人加入部隊,經過訓練正式成為「機場特警」嘅共同經歷。雖然主演幾位欠缺多少剛陽味,但平常我哋只係搭飛機先見到嘅「機場特警」神秘感十足,有一定嘅吸引力。

《多功能老婆》

《多功能老婆》屬於小品形式劇集,但當主演嘅係楊千嬅又好似唔同咗喎!藍飛(楊千嬅飾)揭發丈夫尚劍雄(黃浩然飾)出軌!失婚嘅藍飛獨力撫養兒子,更加分租自己嘅住所過活。因此遇上榮浩田(周柏豪飾)成為歡喜冤家,好難尚劍雄回心轉意,藍飛又會揀邊個呢?不過早前曾經傳出無綫考慮到社會局勢同埋相關演員嘅新聞,劇集將會押後到起碼下年4月先播出。

睇完大家有冇心水呢?想知台慶劇最後由邊一套突圍而出,大家拭目以待喇!