小鮮肉邊有得揮!細數娛樂圈魅力中佬

近年小鮮肉熱潮席捲娛樂團,無論睇劇定睇戲,總有一堆小鮮肉充斥鏡頭。鮮肉見得多,又點及型佬咁有味道呀!就同大家轉下口味,睇睇娛樂圈嘅魅力中佬啦!

郭富城

城城咁多年來唔單只個樣Keep到,作為亞洲舞王,佢嘅爆肌身材當然唔使講啦,無愧「不老男神」封號。由廿歲型到54歲,佢一直走在潮流嘅尖端!時下潮流興剪六四分界嘅「韓仔頭」,原來廿幾年前郭富城已經剪咗,仲係佢嘅標誌招牌髮型,今日睇返依然絕不過時!

劉德華

幾前年華仔大曬佢同成班舊同學嘅合照,令人驚訝嘅係,58歲嘅華仔同合照中嘅舊同學相比明顯年輕好多,引起網友熱烈討論。凍齡華仔係好幾代人嘅共同偶像,到2019年嘅今日,劉德華依然冇乜點變老,只係多咗幾分成熟男人味!華仔出名勤力,佢嘅不老體態都係靠努力得嚟,據聞華仔長年飲食清淡,仲請埋營養師調理日常飲食,幾晏返屋企都會抽時間做運動,練出一身精壯身材。

古天樂

皮膚黝黑嘅古天樂,就咁睇外表真係估唔到原來佢已經49歲!穿著西裝,然後戴住黑超,man過唔少時下小鮮肉九條街呀!不過其實古天樂後生嗰陣都青靚白淨,做過小鮮肉㗎,後尾佢轉變形象特登曬黑!真係後生做小鮮肉,中年變型佬呀!

唐文龍

前幾日唐文龍正式「入五」,踏入50歲!出名「佬味」重嘅唐文龍,人到半百依然健碩,平時成日練泰拳keep fit,仲識得畫畫設計、滾軸溜冰、詠春、洪拳、單車,兼且係未婚嘅博士生!齋睇啲肌肉都揮低唔少小鮮肉啦!

方中信

56歲嘅型佬方中信,有港版「李察基爾」嘅美譽!佢玉樹臨風嘅外型,唔單止令師奶及中女心心眼,連00後嘅少女都照樣通殺!年過半百嘅佢,仍有心有力,鐘意運動嘅方中信仲成日行山打卡!年紀越大反而越有佬味,令佢嘅男人味更加突出。