小熊都會得罪人?!《維尼與我》內地上映無期

合家歡迪士尼電影《維尼與我》據報未能取得內地上映批文,好可能冇得上畫。官方原因廣電局就無透露,美國《Hollywood Reporter》報導就話佢地有可靠線人,指《維尼與我》未能取得批文,原因同國家主席習近平有關。

事緣「小熊維尼」喺內地網絡世界係禁語,即係如果你喺微博寫「小熊維尼」會被刪post,或者封左你個account;喺上面想搜尋「小熊維尼」,就會咩都搵唔到。

「維尼」一向係兒童書界嘅經典,情節都係友誼萬歲、常伴你左右,非常正面勵志,理論上好適合個國家要求,搞咩事會被禁?

話說主席年前訪美,同前美國總統奧巴馬喺白宮草地散步,唔知傾國家大事定小事,主要係俾公關影個相展示友好。點知公關相一出,就被網友拎嚟同「小熊維尼」、「跳跳虎」比較,張相就梗係viral到國際啦。

就係咁,「小熊維尼」被等同為習大大,本來內地網友都係想表現佢地幾咁認同習主席友愛又可愛,一如其他愛國行為等。不過,sorry,唔知係邊方唔多受落,總之「小熊維尼」呢幾個字就此被消失,咁大銀幕就梗係無得睇啦!

而家個個荷里活studio都吼住內地呢塊大餅,因為單係今年第一季內地票房收入已經超越北美地區,成為全球最大票倉。內地對外國電影一向行配額制,上咩片全部都要攞批文,所以為左啲制作有得喺上面上畫,各大荷李活studio各出奇謀,例如搞合拍、搵內地投資者、搵內地演員參演等,博有機會以內地電影身份上映。《小熊維尼》爭唔到個quota其實唔奇,畢竟太多電影、太少配額。

其實就算有官方回應,你都只能夠作為參考,加上而家中美貿易戰,唔係局中人都唔會知係配額問題定係「小熊維尼」本身就係問題!

中國人最識走位,內地戲院唔上都大把辦法可以睇,唔知內地遊客會唔會湧港嚟睇被禁嘅《維尼與我》?