寸爆政圈兼食正肺炎話題《逃出立法院》打爆喪屍政客光復議會

全球受新冠肺炎影響,台灣防疫有成效,成為唔少國家參考對象,效果顯著除咗因為蔡英文政府領導有方外,台灣民眾嘅謹慎亦係主要原因!要避免人傳人其中一個方法就係少出街,就算確診數字算低,台灣觀眾都無因此掉以輕心走哂入戲院,導致台灣電影票房低迷,呢排上新戲成績唔好係非戰之罪,唔一定係爛片!

4月17日將會於全台上映嘅《逃出立法院》就瘋狂得嚟又好應景。故事講述超級廢青王有為(禾浩辰 飾)於立法院裡服兵役,卻在立委熊穎穎(賴雅妍飾)與反派立委的衝突中,意外害熊穎穎使用暴力,不得不引咎辭職。她便強硬的要求王有為替她把立委選回來。連班長都沒當過的王有為就這樣補選上了立委!

新仔上場就遇上立法院爆發化工廠流出活屍病毒,立委高官甚至總統一個個互咬變成活屍,瞬間快速傳染,所有立委成了活屍,立法院成為血流成河的人間煉獄。王有為在與活屍立委廝殺的過程中,發現自己竟對病毒免疫,他與倖存者熊穎穎等人決定打爆活屍,奮力逃出立法院,因為他們全都想要活著出去,一個都不能少!

咁易選得上做台灣立委當然離奇,不過現實中政客表現、言行同其學歷人工又唔成正比,所以廢青選得上又唔係無可能。《逃出立法院》電影設景立法院玩味十足,睇住一班官員受病毒感染變哂喪屍,互相追殺又咬又打都幾過癮。女主角賴雅妍有演過硬朗有型角色,唔係嬌嬌女形象,不過於戲內化身暴力怪又幾新鮮,一嬲就爆小宇宙,使出摔角技都幾爆,佢事前真係有搵專業教練特訓,據聞因此成為台灣第一個學識呢個摔交動作嘅女人!

官都有高質同低質之分,《逃出立法院》擺明恥笑政壇失禮事。由《紅衣小女孩》系列監制曾瀚賢、編劇簡士耕及導演王逸帆合力創作,當初構思故事時應該都無諗過會咁應景,戲內立法院一爆喪屍病毒後,立刻啟動封閉措施(封關?),避免近距離接觸、通報病例同呼籲大家要相信政府,等待政府安排救援!現實台灣政府好可靠,反而台灣以外地區嘅政府就唔多信得過,結果大批民眾要好似賴雅妍同禾浩辰咁自救,靠自己殺出重圍!

打喪屍場面處理爽快,不過幕後團隊其實最想大家感受到地方再差、情況再壞,都要將「家園」變得更好!相信香港觀眾睇都好有共鳴,希望遲啲喺香港會睇到《逃出立法會》!


更多電影文章

法國疫情失控 康城影展改期 參展片難創《上流寄生族》奇蹟?

【外語903】而家睇夠應景《地球末日戰》一早話源頭係……