家住放催淚彈重災區 星爸黎諾懿黃澤鋒諗計自保

黎諾懿一家

反修例運動持續多月,發生多場示威活動,至今警方發射數千杖催淚彈,導致全港多區煙霧彌漫,催淚煙殘餘物更被指對人體和環境造成影響。近日食物及衛生局長陳肇始就話唔會公開催淚彈嘅成份,仲話冇文獻或研究顯示催淚煙會引致二噁英中毒嘅個案。不過早前就有記者確診患上氯痤瘡,同埋有唔少市民都上載圖片表示自己或家中小朋友外出後出現皮膚敏感等反應,真係令人人心惶惶。有唔少家長就已經帶小朋友遠離發射催淚煙嘅地方,就好似藝人黎諾懿咁。

黎諾懿 & 囝囝黎峰睿(小春雞)

今日有報道指黎諾懿與老婆李潔瑩(Nicole),帶埋囝囝黎峰睿(小春雞)去西貢郊區遊玩。家住九龍嘅黎諾懿,原來屋企正正就係早前被放催淚彈嘅伊利沙伯醫院附近。黎諾懿可能為求小春雞嘅健康著想,所以就到西貢共享天倫樂,黎諾懿去到西貢同小春雞一齊分享雪糕,Nicole就幫手影相及拍片留念。食完雪糕後,兩夫婦更帶小春雞到附近公園遊玩兒童設施,最後更開心揀玩具及拎銀包埋單。黎諾懿有家庭後真係盡好爸爸好老公責任,有囝萬事足。

除咗有囝萬事足嘅黎諾懿之外,仲有另一位有囡萬事足嘅藝人黃澤鋒。早前太太高齡誕下可愛囡囡,黃澤鋒對太太更加係愛護有加。唔講唔知原來黃澤鋒屋企亦係放催淚彈重災區嘅屯門。黃澤鋒出席活動時,已表示自己每日都受催淚煙影響而咳過不停,呼吸系統受影響。不過唔好以為得佢一個唔舒服,太太及女兒二人疑似被催淚煙殘餘物影響,搞到皮膚出現過敏反應,手腳長出紅疹。不過出奇嘅係太太竟然識得用自己母乳幫囡囡沖涼,好多媽媽都知道母乳含有大量有益物質,可以殺死細菌嘅抗體。未知係咪因為母乳有抗體,囡囡身上紅疹竟然逐漸散去。不過黃澤鋒同太太都有共識打算搬離放催淚彈重災區,可以為大家有個安穩舒服嘅屋企。

黃澤鋒一家