《宮心計2深宮計》今首播 重溫《宮心計》經典場面

09年嘅劇集《宮心計》,口碑及收視強勁,平均收視有35點,最高收視更達到50點。而無綫重頭劇《宮心計2深宮計》將於今晚首播,今次搵嚟胡定欣、劉心悠、馬浚偉、馬國明及蕭正楠等人主演,劇集繼續有大量後宮妃嬪爭寵及勾心鬥角嘅元素,相信會吸引唔少觀眾收睇,不如而家就同大家重溫下《宮心計》嘅經典場口啦!

第1集:江采瓊慘死

江采瓊(田蕊妮飾)因失職被打至重傷致死。

第3集:烏龜「糖蓮子」被擲死

陪伴光王(陳豪飾)多年嘅烏龜「糖蓮子」被整蠱佢嘅武宗(蕭正楠飾)與王貴妃(葉翠翠飾)擲死,令佢傷心不已,同時亦激發佢爆seed。

第6集:姚金鈴險被縫嘴

尚宫局四房婢女長跪郭太后宫外,希望可以同郭太后對話及求情。期間姚金鈴(楊怡飾)講咗一啲說話令郭太后(謝雪心飾)身邊紅人徐媽媽(李麗麗飾)好唔鍾意,仲攞針線縫佢個嘴,好彩光王及時相救。

第7集:幫何采女做首飾,劉三好破解升掌珍

何采女(曹敏莉飾)請尚宫局幫忙,希望可以憑服飾吸引武宗嘅注意,可惜被王貴妃故意搶走自用。三好見佢咁可憐就私底下幫佢趕製過另外一支釵。其後,何采女喺御花園碰到武宗,仲被佢頭上嘅釵吸引,冊封做惠妃。而三好更調去司珍房做掌珍。

第10、11集:蕭正楠被殺,李怡登位

太監馬元贄(李國麟飾)想推舉扮傻嘅光王做皇帝,光王願意同佢合作造反後,馬元贄等人將武宗殺死。武宗死後,李怡正式登位。雖然郭太后喺登基大典期間反對,仲話大唐嘅命脈唔可以交俾一個癡兒,之後李怡就即刻變返正常人,仲將國家大事講得頭頭是道。

第13集:金鈴為三好試針

程穎芳(陳琪飾)故意令三好右手受傷不能靈活運用,金鈴見到三好痛苦及傷心,希望李怡可以諗辦法。太醫就話可以試下用針刺穴位,金鈴一口答應為三好親身試針。至於害人嘅程穎芳就被主謀馬元贄毒啞及處死。

第14集:郭太后被馬元贄殺死

郭太后企圖跳城,之後被鄭太后(韓馬利飾)打入冷宮。馬元贄去到冷宮探望,郭太后係咁鬧佢人閹人,最終喺爭執期間被殺死。

第16集:金鈴封為麗妃

金鈴幾經波折,終於喺呢集同萬寶賢(李施嬅飾)一齊封為妃子。

第19集:蔡尚宫離宮

蔡尚宫一向俾人感覺係才德兼備,最終被姨甥女譚司饍(惠英紅飾)揭發當年陷害阮司設(關菊英飾)及鍾司制(米雪飾),令佢原本完美嘅風光離宮計劃泡湯。好彩三好代表三司為佢求情,鄭太后允許佢以百姓身分回鄉養病。

第20集:麗妃流產

麗妃失足撞向檯角,太醫證實流產。其後麗妃發現萬夫人(林漪娸飾)去咗道觀請人施巫術,意圖令麗妃冇咗個BB。雖然萬夫人嘅行為已經被賢妃阻止,並將布公仔燒毀。麗妃誣陷萬夫人,經搜查房間後,布公仔竟然喺萬夫人嘅床下底揾到,最終被判绞刑。

第22、23集:布公公被掟死

布公公(蔣志光飾)無意間知道麗妃流產唔關萬夫人事,最終被麗妃用石頭掟死。

第30集:萬將軍全身癱瘓

心狠手辣嘅馬元贄收買萬將軍(張國強飾)嘅手下,向佢賜毒酒,雖然毒酒不足以致命,但佢令佢全身癱瘓同埋唔可以講嘢,只可以透過轉動眼睛同人溝通。

第31集:賢妃被迫飲滑胎藥致死

金鈴一直妒忌懷有龍種嘅賢妃,喺佢懷孕期間一直扮好人。金鈴借太子嘅時候,就係馬元贄造反殺皇帝嘅日子,鄭太后聽到好驚,金鈴煽動佢下旨要賢妃滑胎。金鈴奸計得逞,得到鄭太后同意,名正言順迫賢妃飲藥滑胎,最終一屍兩命。

第31集:三好冊封為德妃

三好懷有高顯揚(鄭嘉穎飾)嘅骨肉,被馬元贄發現及當中揭發。三好承認懷孕,李怡為咗保護佢已冊封佢為德妃,救返佢一命,三好感激不已。

第33集:三好離宮與顯揚重逢

李怡承諾俾三好出宮生活,三好帶埋個女返揚州,並與逐漸恢復記憶嘅顯揚重逢。