宣萱期待重溫《美味天王》 古天樂冇眼睇嗌熄電視

東方日報
古天樂及宣萱對舊作各有睇法。(設計對白)

藝人古天樂及宣萱廿多年前合演的TVB劇集《美味天王》昨晚重播,二人昨日出席活動時被問到此事,古仔搞笑叫大家熄電視不要翻睇,相反宣萱則認為是美好回憶,有時間會收看。

古天樂及宣萱昨日出席護膚品牌活動,分享近況及護膚心得,並即場為模特兒按摩面部,宣萱手勢純熟,古仔則做錯方向,更作狀篤女模的鼻窿,場面搞笑!二人透露忙拍新片,預計幾日內煞科,古仔表示農曆新年前將忙拍另一套戲,不過新春會有一星期假期:「年年都會留港同親戚拜年,係一年一次習俗。」宣萱亦透露留港度歲,因不會揀旺季去旅行。

講到近一年已合作了第三部電影,問二人是否已對到厭?他們笑言有永恒的默契,宣萱說:「佢開工嗰陣唔得閒理我,但大家都係好直接嘅人,咁樣幾好。(試過鬧交?)真係冇。」古仔說:「我熟佢性格會放心啲,做演員最緊要演好部戲,最多有意見唔同。」講到廿多年前合演的TVB劇集《美味天王》昨晚重播,古仔笑言向來少重睇舊作,還叫大家準時熄電視:「拍嗰陣已經睇好多,所以唔使睇番,向前看!」相反宣萱覺得是很好的回憶:「有時間會再睇,好搞笑,我個頭(指髮型)。」不過古仔表示父母有幫他儲起剪報,甚至舊作的錄影帶。提到同公司的林峯結婚,古仔表示會送禮,但未想到送甚麼,宣萱則視乎對方需要,例如搬屋要添置甚麼用品。

蔣怡親子北上冇有怕

同場的名模蔣怡透露早前帶小朋友返成都探親,父親的孖生哥哥在當地居住,二人十足餅印,而且身形高大,一同出街時十分矚目,情景搞笑!問她會否擔心內地疫情問題,她指當時尚未爆發,她也是返港後才得知新聞,但一向注意安全及衞生,亦有問其他媽媽是否需要為小朋友打針。