安采妮晒CCTV片遭陳達仁郁手郁腳

東方日報
陳達仁從後箍實安采妮。

藝人安采妮和已婚的前經理人陳達仁關係糾纏不清,近日又傳她做小三,介入訓練犬隻行為顧問朱Sir的婚姻。采妮受訪時坦言再被冠小三之名,懷疑有人要逼到她走投無路:「我講緊前經理人,佢到今時今日仲係想我返去佢身邊。」

她首度公開堅持離開對方的原因:「其實我被人郁過無數次,次數多到我都唔記得。最深刻一次係搞到我入醫院,嗰日我生日約咗屋企人食飯,佢覺得我講大話,好嬲咁衝上嚟我屋企,跟住就郁我。(點解唔報警?)我好驚冇咗藝人呢份工,冇錢點生活?我屋企有10幾隻狗同貓要養。」

「冇介入人哋婚姻」

她還提供多段手機及CCTV短片,片中二人扭作一團,采妮一時在床上被拉扯,一時在門邊被從後箍實,她嘗試掙扎擺脫離開。她坦言公開片段,全因對方不停向外界表示很錫她、對她好,擔心不知情者信以為真。問到對方是否很迷戀她?她說:「我都感覺到,不過唔會接受,因為佢有太太,又好多時會郁手郁腳,如果真係愛我,絕對唔會咁囉!」

對於被指介入朱Sir婚姻,她發誓說:「我冇介入人哋婚姻,我依家係單身,喺社交網同男仔一齊嗰啲相,係攞嚟激前經理人。因為佢講過,如果我有男朋友就放開我,希望佢真心放過我。」她續稱:「朱Sir有同我講唔好意思。(會聯絡朱太解釋?)佢情緒好激動,掟晒朱Sir啲衫出街又趕我走,我都想同佢解釋,但等佢平靜番先再傾。」她又直言:「佢(陳達仁)搞咁多嘢,都係想我返去身邊,但一定唔會!」

「佢想轉移視線」

至於陳達仁被爆對采妮「郁手郁腳」,雖然表示不想特別回應,但卻斥對方想轉移視線:「成件事係精心部署,推得一乾二淨,係都要搵我嚟射!我真係驚咗,畀佢搞到好煩。」他以「大家搶嚟搶去」來解釋「郁手郁腳」:「依家唔係揸住佢條頸係咁打吖嘛!」對於采妮與人夫鬧出桃色緋聞,他說:「其身不正爆咩料啫?佢想轉移視線令自己變番玉女,用眼淚博人哋同情,佢目的好簡單,淨係想光明正大同呢個朱Sir可以拖住手行街。」並強調不會再與采妮見面!

二人扭作一團。
安采妮強調絕不會返回陳達仁身邊。