孫慧雪拍飄雪凍傷失知覺

東方日報
雪雪凍到雙腳失去知覺,冇力行落山。

深受網友喜愛的藝人孫慧雪完成了結婚及生仔兩個人生重要階段,入行逾10年的她最近希望一圓歌手夢,近日到日本北海道為新歌拍攝MV,配合名字「阿雪」在雪地取景!她連續數日在零下五度的低溫穿薄衫捱冷開工,期間遇上大雪,鏡頭前有大量飄雪,畫面唯美。

美腿變紫跣落山

怕凍的雪雪有苦自己知,開工撞正生理期,捱冷兩小時後更凍傷腳,美腿變成紫色一撻撻,她說:「我喺一個水泉旁拍攝,啲服飾唔算太厚,拍咗兩個鐘,凍到成個人麻木晒,拍嗰陣好投入,到後期開始凍到震晒,對腳冇晒知覺,仲變咗紫紫哋!當時我都好驚,大叫係咪要截肢(口架)?走嘅時候自己唔夠力行落山,要邊行邊跣,好多謝拍攝人員扶住我走,好照顧我!」她連續數天都由天光拍到天黑,又攰又凍又傷,但認為絕對值得:「今次係我第一次睇到咁大雪,真係好靚,返到酒店暖番就冇咩事。」

囝囝Riley出世後,雪雪盡量接一些時間短的工作,今次是首次出埠工作,自然對兒子牽腸掛肚,她表示回到酒店就要開視像通話:「老公話BB係咁嗌媽媽,夜晚唔肯瞓覺,好慘咁,真係好掛住BB呀!」

文:影視組

漫天飄雪,雪雪睇到唔捨得眨眼。
MV畫面唯美,但就犧牲了雪雪的美腿,凍傷變成一撻撻。
雪雪時刻掛住囝囝。