【嫁雞隨雞】《嫁到這世界邊端》藝人版 位位變幸福人妻

唔少女藝人遠嫁他鄉,結婚後都嫁雞隨雞,跟丈夫移居到異地居住兼生兒育女。佢哋放棄香港娛樂圈工作,過住幸福少奶奶嘅生活。今日就同大家睇下有邊幾位《嫁到這世界邊端》嘅女藝人啦!

陳美齡

63歲陳美齡於70年代初期已日本歌壇出道。1986年下嫁日本經理人金子力,移居日本,先後誕下三位兒子,而三個仔仔都成功考入世界頂尖嘅美國史丹福大學。陳美齡淡出娛樂圈後,更曾任職隨筆作者、大學教授等等,可以話係一位樣樣佳能嘅女藝人。

李婉華

50歲嘅李婉華曾經係無綫當紮小花,參演過多部劇集,例如《公私三文治》、《蜀山奇俠》及《卡拉屋企》等等。01年與加拿大籍股票經紀人李守正交往,03年結婚,婚後育有兩子一女,隨後息影。 早前啱啱喺播完嘅無綫劇集《再創世界》就搵咗李婉華客串,飾演鍾嘉欣嘅同事Karen。

葉玉卿

85年亞姐季軍,之後並成為女演員同歌手。葉玉卿喺1995年認識華裔商人胡兆明,二人於1996年結婚,婚後更正式退出影壇、舉家移居美國,更協助老公打理超級市場業務。除咗幫丈夫嘅事業之外,佢更係一位好媽媽,照顧兩子一女。有報道指葉玉卿嘅紐約屋企係一個過百年嘅古堡式莊園,內有私人高爾夫球場、室內外泳池同影院,真係好令人羨慕呀!

鍾嘉欣

選美出身嘅鍾嘉欣拍下好多令人難忘嘅無綫劇集,例如《溏心風暴》系列、《公主嫁到》、《點解阿Sir係阿Sir》及《巨輪》等等,所飾演角色大都是乖乖女。當日嘉欣宣布結婚時更引起熱話,遠嫁加拿大藉脊醫老公,誕下一仔一女。雖然婚後嘅佢減少演出,但最近都有為《再創世紀》客串飾演林文龍女朋友。

蔣雅文

蔣雅文(Mandy)曾經係英皇娛樂旗下歌手,並與鄭希怡(Yumiko)同埋劉思惠(Maggie)組成組合3T。14年尾下嫁台灣設計師朱經雄,婚後Mandy成為台灣人妻,喺台北、花蓮兩地分別開設名為「心地日常」嘅兩間文青雜貨店,更被網民封為「第一代文青女神」!

李美鳯

87年港姐亞軍及最上鏡小姐,1996年再婚並下嫁台灣富商鄭翔中,誕下一對龍鳳胎,婚後過住幸福少奶奶及相夫教子嘅生活。被網民稱為「電眼美人」嘅佢仲話有機會等到仔女長大後會考慮復出,真係令人期待呀!

張鳯妮

87年港姐「最受佳麗歡迎獎」得主,98年嫁俾馬來西亞富商傅仰,婚後居於吉隆坡並誕下三女。退出香港娛樂圈後,除咗專心照顧家庭之外,佢仲係大馬一間薯條連鎖店嘅老闆娘。當年佢參演多部劇集,包括《愛情三角錯》、《餐餐有宋家》及《天地男兒》等等。最近佢專誠返港為無綫前金牌監製潘嘉德(德哥)賀壽。

梁小玲

前無綫藝人梁小玲係1968年「麗的映聲」第二期藝員訓練班畢業生,曾參演《強人》及《親情》等經典無綫劇集,其後嫁俾從事從事石油生意嘅老公,並定居於澳洲。婚後誕下女兒無綫藝人趙希洛。

陳秋霞

60歲嘅陳秋霞係70年代香港才女歌手,憑電影《秋霞》成為金馬影后。佢19歲事業如日中天,幾乎成為演影圈嘅傳奇。喺事業最高峰之時嫁俾馬來西亞鋼鐵大王鍾廷森,婚後移居大馬並誕下三女。

石天欣

26歲嘅石天欣星運平平,喺無綫劇集經常飾演被姦角色,所以就被網民笑稱係御用「被姦受害人」。16年7月下嫁美國任職市場營銷老公Jacob,婚後更跟隨老公到美國一齊生活,閒時佢就喺美國做代購賺真銀!