【娛樂圈黑暗】黃淑儀與ViuTV合作拍飲食節目 仔仔徐肇平被無綫雪藏

好多人都話娛樂圈黑暗,有好多嘢觀眾及網民都未必會知道,但一班幕前嘅藝人就深深領會,其中一個就係資深藝人黃淑儀(GiGi姐)。GiGi姐過往喺無綫飾演過無數媽咪嘅角色,及拍過唔少飲食節目,不過佢今年1月初已經約滿,回復自由身後Gigi姐首度與ViuTV合作,夥拍組合ERROR成員肥仔及保錡主持全新節目《Cooking Gigi 台灣篇》。倒戈相向會唔會得罪無綫?Gigi姐就冇留戀,同埋已經有心理準備唔可以返無綫做節目及拍劇,另外無綫嘅「山頭主義」亦都容不下佢。

《Cooking Gigi 台灣篇》

Gigi姐係70年代無綫嘅當家花旦,當時有好多劇集佢都擔任女主角。不過80年代因為移民到加拿大,而淡出娛樂圈。身為好戲之人嘅GiGi姐,2000年代重返幕前,憑《廟街媽兄弟》嘅王太太同埋《錦繡良緣》嘅上官丹鳳,獲得觀眾喜愛。另外,監製潘嘉德退休之前嘅《婚姻合伙人》及熱播中嘅《好日子》Gigi姐都有份參與。

《好日子》

Gigi姐一直重視家庭,佢與前夫劉芳剛及現任丈夫徐景清醫生合共生咗四個仔女,而咁啱孻仔徐肇平有演藝細胞,佢於溫哥華讀演藝畢業後就聽Gigi姐返香港發展,當時無綫因為見到徐肇平同Gigi姐一齊上節目,所以決定同佢簽一年生一年死約,做咗無耐就想同佢簽一個長達六年嘅合約。不過可能徐肇平比較外國人性格,覺得無綫冇一個長遠計劃,就算Gigi姐落咀頭都好,徐肇平都決定唔簽長約。

徐肇平&Gigi姐

之後徐肇平嘅工作量大減,仲俾人列入黑名單。徐肇平於2015年時夥拍Gigi姐,首次以母子合作參與舞台劇《有限人生無限愛》演出,當時有記者想訪問佢哋,但當時徐肇平已經被列入黑名單唔俾出鏡,Gigi姐為仔仔感覺好痛心。同年,徐肇平推出食譜書,當時獲得好多人到場支持及恭喜,事後仲一齊食飯慶祝。但偏偏呢個時候,無綫嘅經理人打電話鬧班年輕人冇用腦,點解佢俾人雪藏都仲去支持!

Gigi姐表示仔仔冇做錯,只係唔簽約都好無辜被公司咁樣對待,做阿媽梗係心痛!不過徐肇平而家已經轉投ViuTV,有參與多部劇集嘅演出、亦有做司儀及模特兒等等工作。

《身後事務所》


另外,Gigi姐仲話其實唔復出,一樣可以唔使工作咁生活。自從離巢後個人輕鬆咗,平時可以到唔同機構舉辦烹飪班,又可以參與唔同電視台嘅烹飪節目,做返自由人,可以因自己時間及興趣接工作,實在係開心過以前好多。