娛樂公司被貼追租告示 林敏驄否認係老闆

今年2月由冠軍娛樂有限公司出品,林敏驄(阿驄)自編、自導、自演嘅電影《如珠如寶》喺農曆新年上映收破千萬票房,叫好又叫座。點知事隔兩個月有傳冠軍娛樂有限公司嘅辦公室欠租幾個月,而家公司仲重門深鎖,漆黑一片,十足十關門大吉,而且公司玻璃門上仲有管理處貼嘅追租告示。但搞笑嘅係公司註冊處紀錄顯示冠軍娛樂仲未結業,究竟發生咩事呢?

咁就要搵下幫佢哋做顧問嘅林敏驄啦,阿驄就話平時會幫佢哋兼職接工作拍吓嘢,更表示「佢哋租約嘅嘢,我唔清楚,你哋問番佢哋。我只係幫佢哋搞創作,租約唔係我簽,我又未見過張租約,月租幾錢都唔知。」同時亦都否認係冠軍娛樂老闆。

但有人發現上年3月創作歌手曹震豪喺微博上載大家係冠軍娛樂有限公司幫阿驄慶祝生日嘅相片並留言:「@林敏驄,生日party暨冠軍娛樂soft-launch,祝大師生日快樂,新公司大展鴻圖!」亦係其他相見到有阿驄嘅獎座相,阿驄就解釋話因為做顧問,所以有自己間房喎。