姚子羚亂搞關係 生擒張達倫

東方日報
陳山聰踢爆姚子羚劇中關係「立立亂」,還要色誘張達倫!

姚子羚與陳山聰日前到西貢為新劇拍外景,被對方踢爆戲中關係「立立亂」的子羚,自揭跟張達倫有激烈的親密場口,着性感睡衣色誘對方!

正趕拍無綫劇《大步走》的姚子羚,當日劇情講到她為避開張達倫而到山聰屋企借宿一宵,子羚笑言兩人劇中亦師亦友,成日嘈交:「佢直頭當我係男人,但最後原來不經不覺係互相有對方喺心入面。」問到可會有親熱場口?山聰笑言劇本仍未寫到,但率先爆料指子羚的關係「好亂」:「佢中間又同張達倫、胡諾言咁!」子羚即提醒山聰指兩人會有不經意錫錫的戲份,又自爆會色誘張達倫:「有擒喺佢身上面、嘈嘈吓交會突然錫佢、又會着性感睡衣,係激啲嘅!」山聰聞言即刻抵死指自己冇需要:「我唔啦!呢套戲健康到不得了!」

重提「四失」:人生低谷

兩人表示會一直拍攝到11月中,子羚呻曬得最黑,即被山聰取新朵為「姚賓賓」:「你睇佢隻手都黑晒,佢本身好白o架!」透露稍後拍攝「戲肉」:「拍真正嘅跑步戲。(跑得好勁?)係佢跑,唔係我!」提到快將成人夫,是否藉拍新戲Keep Fit?山聰說:「長期都有Keep,身形唔好變化得太緊要就OK,我又唔似太太需要着婚紗,我係褸住晒,好醒咁遮晒所有位。」

另外,山聰日前接受電台訪問,重提跟賭王千金何超雲拍拖後頓變「四失」,他坦承是人生最低谷的時候,對前妻有所虧欠,但不想一世暱埋,幸得曾志偉為他穿針引線,2014年得以重返電視圈。他又指「準陳太」Apple說過一句:「你嘅過去關我乜嘢事?」令他感覺遇上對方是三生有幸。

姚子羚為免再曬黑,要搵碇暱!
烈日當空拍外景,睇姚子羚就知有幾辛苦。