姊妹送祝福 譚嘉儀撲定「飛」觀禮

東方日報
譚嘉儀預定飛去海外,見證「雁鄭」成婚。

「雁鄭戀」修成正果並將於年底結婚,一班圈中好姊妹收到消息都戥何雁詩開心,當中蔡思貝坦言得知時開心到落淚:「超級無敵勁開心!祝願佢哋兩個一輩子幸福,相親相愛。」Super Girls成員Cheronna亦開心指是首批知情的朋友:「真係好開心,嗰種心情好興奮!朋友裏面逐個拉埋天窗,最近又參加咗唔同嘅婚禮,全部都覺得好感動。(你自己心唔心急?)我冇恨嫁,有就有、冇就冇,暫時我祝福人就得o架啦!」

另一好友歌手譚嘉儀亦戥兩人開心:「恭喜佢哋,終於拉埋天窗,見到佢哋一直都Sweet,Fred又好錫佢,佢又好照顧Fred,我知佢哋嚟緊年底喺海外結婚,我都會過到去,希望到時可以見證住佢哋世紀嘅婚禮。」而陳瀅亦表示收到消息很開心,祝他倆白頭到老、永結同心。

Cheronna得知喜訊後勁興奮,蔡思貝直言開心到落淚!