【如果這樣生活】朱千雪淡出幕前停工讀Law 盤點5大娛圈法律女神

東方新地 - 娛聞

TVB節目《如果這樣生活》昨晚播出的一集,有如假包換喺大學讀法律的朱千雪(Tracy)做嘉賓主持,千雪去到日本分享對生活、擇偶嘅看法!其實除了千雪BB外,圈中讀法律出身的女星仲有十優港姐麥明詩、戴祖儀、楊張新悅,以及呢位現時做緊大律師的前無綫藝人!果真美貌與智慧並重。

撰文:東方新地|圖片:新傳媒、Instagram、劇集劇照

延伸閱讀:

【烈火雄心】緊接《法證先鋒III》播出 盤點8套最想深宵重播的超級神劇

細女王麗嘉失戀派「肉照」 老尷王敏德遷怒老婆馬詩慧

朱千雪《如果這樣生活》談滿足

朱千雪喺昨晚的《如果這樣生活》中,去日本東京找尋自己嘅初心,朱千雪認為都市人大多追求物質生活,而她選美後加入娛樂圈,拍過劇集、拍廣告、做商演等等,生活五光十色也有可觀收入,但她還是嚮往簡樸的生活,而只要堅持信念,其實生活可以好滿足!這次她走訪一位三十多歲年輕男子,對方每天架駛載一架著幾百本書的麵包車店當成賣書,即使收入不高但一直也堅持夢想。

千雪認為有這樣的一份是自己夢想的工作很不錯,如果對方是她的另一半,作為太太的她也會相當支持,不過千雪BB也提到如果對方收入不高,自己收入也不高,但她一樣會支持丈夫,情願多做一份工去增加收入。

千雪笑說認為對方是很好的男生,因為他為人友善、純良、而且對生活充滿熱情,這些都是她擇偶的重要條件之一。

千雪也講到在香港生活和娛樂圈,人和人之間都會愛比較,討論誰的收入高、誰肥誰瘦,而她以前在外國無論任何職業都能互相建立友誼,沒有貴賤、高低之分和比較!

盤點5大娛圈法律女神

朱千雪

香港網民至愛的朱千雪為2012年香港小姐季軍,參選時深得網民支持,當年無綫電視首次推行一人一票選出港姐冠軍,但最後網上投票系統伺服器發生問題,三甲依舊按評判評分選出,千雪最終只獲得季軍!而冠、亞軍分別為張名雅、黃心穎。


2012年港姐冠軍張名雅、亞軍黃心穎及季軍朱千雪。

《EU超時任務》入屋

千雪選港姐後加入無綫,參演過不少劇集,但說到其代表作一定係2016年《EU超時任務》!千雪飾演的Madam Ling凌晨風令人留下深刻印象,與渠頭(王浩信飾) 的一段情更是讓觀眾心酸落淚!

喺當年台慶頒獎禮中,朱千雪同王浩信都憑《EU》成為視后、視帝大熱,不過最終只獲「最受歡迎劇集搭檔獎」,唔少觀眾都好失望!

《踩過界》再遇王浩信

大家以為朱千雪同王浩信喺《踩過界》可以有個圓滿結局啦,點知……
《踩過界》中單立文錯手殺死愛女朱千雪。

 

美貌與智慧並重

美貌與智慧並重的千雪BB人紅唔囂又夠貼地,發展演藝事業之餘亦是好學不倦!千雪早年畢業於西門菲莎大學商業和傳理系,後來於香港中文大學攻讀企業傳播社會科學系碩士都仲未夠,佢選擇停工一年,再修讀香港城市大學法律博士學位!

朱千雪為人貼地,素顏返學待人絕無架子,據知仲引來唔少狂峰浪蝶,成為Law界女神 !不過佢為讀書犧牲不少私人時間,有時一日要花10至12小時溫習。

轉做「Law界女神」

朱千雪近年減少拍劇,專心攻讀法律博士課程,早前有傳即將畢業的千雪,已獲金鐘一間Top 5著名律師行招攬預留職位,而佢本人都有意淡出幕前轉職法律界,正式轉做「Law界女神」!相信觀眾們都大感不捨!


|麥明詩

「十優港姐」麥明詩就唔使多介紹啦!麥明詩當年會考奪得10A佳績,後來升讀世界著名學府劍橋大學法律系,憑高學歷成為一時佳話,最後更以大熱姿態奪得2015年港姐冠軍。麥明詩奪冠後未有選擇從事法律行業,隨即加入大台成為藝人,不過坊間對其評價都係好壞參半……

不過當年有傳佢人緣麻麻,猶記得佢當選冠軍的晚上,一眾佳麗猶如摩西分開紅海一樣退到兩旁,完全冇人上前祝賀…

評價好壞參半

可能以港姐冠軍來說,麥明詩又真係唔算咩神級靚女,之前更有網民力數「麥明詩10宗罪」,話佢撈唔掂娛樂圈添!而麥明詩確實有種高材生的氣質,加上現時待人處事變得成熟圓滑,談吐舉止大方得體,另外又以敢言見稱,不時對社會時事發表意見,離地變貼地!


麥明詩最近都以一頭短髮示人,大家覺得好唔好睇呢?

《#後生仔傾吓偈》夠出位

麥明詩夠貼地,同另一港姐冠軍馮盈盈一拍即合,兩人主持的《#後生仔傾吓偈》大受網民歡迎,經常喺節目中有大膽出位言論,麥明詩同馮盈盈可以話係改變咗多年來港姐冠軍的固有形象!

無錯啦,最叻就係「9up」!

劇接劇表現麻麻?

麥明詩除了主持節目,近年都獲大台力捧,演出過幾套劇集,可惜演技被批認真麻麻,唔知佢喺《是咁的,法官閣下》同之後的《殺手》表現如何呢?

《賭城群英會》劇照
麥明詩去年亦有參演台慶劇《誇世代》

麥明詩爆做律師未必風光

早前無綫上載咗一段叫「是咁的,律師未必好風光」嘅宣傳短片,片中見到幾位新牌律師喺茶餐廳食飯,個個都大呻做律師有幾慘!有人話要通三日頂、接一個Case得5千蚊、一碟飯兩份分、仲要住劏房乜乜乜。嘩!乜做律師係咁嘅咩?

劍橋大學法律系畢業的麥明詩就話做大狀第一年係無人工,之後要喺金鐘同中環租office就更加辛苦,頭幾年都未必會賺錢,甚至會蝕錢!

麥明詩仲話事務律師人工有幾萬元一個月,不過要做有關上市的公司每日都要做14-15個鐘,就連假日都要做嘢。佢又話喺Local Firm做事務律師人工會比Corporate Firm低好多,每個月都係得萬幾至三萬幾蚊。

|戴祖儀

戴祖儀今年23歲女,原來喺本身英國萊斯特大學修讀法律,不過畢業番香港實習時發現自己唔適合當律師,決定當獨立歌手,去年推出個人首支創作單曲《細看近年,那信念》。今年二月被星夢娛樂老闆何哲圖賞識,於是簽約正式出道。之前戴祖儀曾跟洪永城拍攝微電影《愛情沒有來的時候》,另外仲有未出街的《多功能老婆》。

《愛情沒有來的時候》

曾於台北進修音樂期間,拍攝影片宣傳世界大學運動會,因展示多個可愛姿勢而備受注目!

星夢歌手到隔離ViuTV上節目

未拍微電影之前,其實Joey仲好弔詭咁上過隔離ViuTV嘅遊戲節目。都算喇!仲要係綜藝節目《四囝》,大玩校園限制級遊戲?!


前菜係估下邊個食香口膠同坐凳嘅遊戲。

最後嘅重頭戲肯定係呢個食麵遊戲。睇見佢兩個食得咁肉緊,小編都分唔到到底係邊個食緊邊個嘅麵,邊個又係邊個下面努力咁食麵⋯⋯

究竟係咪行清純女神路線⋯⋯

戴祖儀

又靚女,又有好身材,又多才多藝,相信未來Joey仲會有更多演出機會!

💫No one’s life is perfect✨ be thankful for everything we have💛 and be kind⚡️

A post shared by JOEY THYE 戴祖儀 (@joeythyee) on Mar 16, 2018 at 6:48am PDT







|楊張新悅

現年41歲的楊張新悅十年前淡出娛樂圈,在07年與教育局前政治助理楊哲安結婚後息影,並於10年間誕下三個囡囡Lucy、Lily和Leah,分別已經9歲、7歲和3歲。今年四月楊張新悅喺社交平台宣布陀第四胎,本來佢講過封肚唔生,但老公的「安全措施」唔安全而再懷孕,第四位小公主亦已在七月出世!

港大法律系出身

楊張新悅除了係索爆靚媽,其實佢仲係一名才女,中學畢業於名女校聖保祿學校,之後更考入香港大學法律系!不過楊張新悅接受訪問時,回想當年雖然入讀法律系,但讀書時方發現自己心中根本沒有那團火,所以從未打算成為律師。


碩士第一名畢業

2010年時楊張新悅回歸校園,回到母校香港大學修讀環境管理學碩士,兩年後更以全班第一名成績畢業!

|盧敏儀

邊位係盧敏儀?其實佢早於80年代已加盟無綫,主要是擔任主持《勁歌金曲》、《Sunday任你點》以及台慶等綜藝節目,佢演出較讓人深刻的劇集,有跟梁朝偉合作的《再見十九歲》、《成吉思汗》等,至1997年跟丈夫孫敬安結婚而息影。盧敏儀早在1998年修讀倫敦大學校外課程的法律學士,2003年完成碩士課程後投身法律界,現已為大律師,於清洪大律師事務所工作。

盧敏儀於清洪大律師事務所工作。
去年盧敏儀與孫敬安舉行結婚二十週年紀念宴會,有不少紅星藝人出席。

延伸閱讀:

【烈火雄心】娶細廿年嫩妻仲老來得子!59歲李子雄Fit到爆全靠xx