《好狗特攻隊》戲精警犬完美過OPPA

近期最熱電影話題係「動物讀心術」?繼荷里活合家歡喜劇《怪醫D老篤》,由羅拔唐尼主演嘅D老篤可以同班奇珍異獸溝通做朋友,仲可以一齊旅行冒險後,又到韓片發功!今次由《北韓諜戰》影帝李民星化身論盡特務,拍住隻英明狗拍檔,於《好狗特攻隊》齊齊出更破案。

故事講述繼韓國情報局探員朱特務(李星民 飾)被指派保護訪韓國寶級大使─熊貓明明,不料牠一下飛機,旋即被恐怖分子綁走,追捕期間遇上豬隊友而頭部受重創!意外後,朱特務以為自己跌壞腦,竟然聽得明動物講嘢,為咗保住份功兼立功,決定善用突然其來嘅超能力,拍住唯一目撃警犬Ali,周圍同班動物收風攞料!

過程當然笑料百出,成為最強線人嘅動物們非常搶鏡,好似警局入面一缸金魚就好識得善用朱特務嘅新技能,駛出煩膠功,不停重覆轟炸,務求朱特務幫佢地搵出掉鼻屎入魚缸嘅無品探員!《好》內動物隻隻搶鏡,幫佢地配音嘅韓星功不可沒,其中黑山羊由《上流寄生族》嘅有錢老公李善均聲演、熊貓明明由《鬼怪》劉仁娜配音而睿智猩猩則由《上流寄生族》內嘅恐怖女管家李姃垠聲演。

至於主角狼狗Ali則由《炸雞特攻隊》內飾演黑幫大佬嘅申河均聲演,不過狗演員本身亦係影帝級,第一次拍戲嘅Ali由輕佻到慘情都交足戲,連動作場面都搞得掂,現場準備嘅狗替身都用唔著,Ali自己一隻搞掂哂,連老戲骨李民星都大讚佢勁有天份,反而第一次同動物拍戲嘅佢要用替身狗,因為Ali太重佢抱唔起!

鍾情動物、尤其係狗狗嘅觀眾一定會睇得好開心,因為本身電影有狗做主角已經好加分。《好狗特攻隊》果隻仲要識講嘢又醒目,辦事能力仲高過由裴正楠飾演嘅警探,直情完美過OPPA!