《她她她的少女時代》題材貼地 網民反應正面

《她她她的少女時代》劇照

無綫劇集《她她她的少女時代》搵嚟田蕊妮﹑李思捷及曹永廉主演,劇集以以中年危機做主題,主要講述失婚中年女子面對嘅危機,及如何自強不息及勇敢地重拾夢想。劇集喺星期一已經開始播出,等我哋一齊睇下網民有咩反應啦!

節奏明快

劇集喺頭兩集就講人到年中嘅方迎風(田蕊妮飾),每日淨係為囡囡張晴(林凱恩飾)及生意勞碌,點知突然迎來老公張智強(曹永廉飾)移情別戀,方迎風去跟蹤小三林若藍(梁芷珮飾),與老公婚姻輔導失敗,最後決定離婚,重新搵工過新生活。喺短短兩集中,劇情已經清楚交代劇中主角嘅關係、失婚失業嘅中女要面對啲咩危機及出軌男人內心忐忑嘅心情等等,唔少網民睇完都大讚節奏明快及敘事清楚簡潔,仲話相信會越嚟越好睇。

《她她她的少女時代》劇照

故事貼地有共鳴

劇集監製廖晉碩擅長拍貼地小品,上一套作品《BB來了》講述新手爸媽生B湊B嘅生活點滴,成功引起新舊手爸媽共鳴。今次就講述雙失中女面對中年危機,自強不息嘅故事,劇情道盡中年心聲,夠晒貼地及有共鳴。

少女版田蕊妮好搶鏡

區明妙(Stephanie)喺劇中飾演少女版方迎風(田蕊妮飾),佢喺第一集嘅第一幕已經出現,劇情首先簡單介紹佢同家姐(鄭可琳飾)一齊去追星。再之後,佢就去勇救被同學取笑及欺凌嘅師兄張智強(王樹熹飾)及喊住求老豆(李國麟飾)唔好趕走家姐等等。今次佢喺《她她她的少女時代》成功演繹唔同嘅演技,加上穿起校服毫無違和感,成功吸引網民注意,搶鏡成功。今年只有18歲嘅Stephanie,原來已經擁有豐富嘅演出經驗,除咗曾經係家燕媽媽嘅藝術中心接受過培訓之外,佢仲喺唔少劇集出現過,例如有《一屋老友記》、《親親我好媽》及《福爾摩師奶》等等,前年喺《親親我好媽》只係出場幾秒,不過已經成功吸引網民注意,更被封為「港版周子瑜」。

《她她她的少女時代》截圖
區明妙

林宣妤吸引眼球

劇集搵嚟唔少新鮮嘅臉孔,除咗區明妙之外,網民仲留意到林宣妤(Serena)嘅出現。《她她她的少女時代》係林宣妤嘅處女劇,雖然喺頭兩集佢只係喺DSE放榜嘅時候坐喺田蕊妮後面,不過佢已經成功吸引網民嘅眼球,紛紛大讚佢好靚女,真係犀利呀!之後佢會係劇中飾演張晴嘅大學同學,中意佢嘅觀眾記得繼續留言啦!

《她她她的少女時代》截圖
林宣妤

主題曲有驚喜

今次劇集嘅主題曲《少年時代》,唔再係由吳若希、胡鴻鈞、菊子喬及鄭俊弘等御用劇集歌手主唱,而係搵嚟入行十年後首次唱主題曲嘅周志康,唔少網民都感覺新鮮及有驚喜。周志康喺劇中都有擔演一角,就係李思捷嘅年青版,即係少女版田蕊妮嘅偶像。

周志康