女車手:停車都照鏡 男車手:最後一刻先剎車?

成日都話男女大不同,其實男仔同女仔無論係性格定係處事方式方面都真係有好多唔同嘅習慣,唔信?望下你同你嘅另一半咪知囉,小編身邊成日都有好多朋友埋怨,點解男/女朋友揸車時會點點點,而跟據非正式統計,一般來講同一個性別嘅人都會有一啲相同嘅揸車習慣,今日就等我小編同大家分析一下男同女揸車嘅時候一啲會令另一半諗極都唔明嘅習慣。不過講到尾為人為己,最重要都係大家要注意路面安全。睇睇!

1. 突然cut 線

好似片入面嘅女仔咁,聽到隔離嘅男方一提醒要cut線就即刻行動,但完全冇留意路面環境,其實馬路上面真係好多車,橫衝直撞咁cut線好危險架。

2. 反應慢

好多時候,等緊紅綠燈時,比較多女仔就會好似片入面嘅女仔咁走咗去照鏡或者做其他嘢,搞到轉咗燈都唔為意,令到後面嘅司機要響安提佢,所以大家揸車嘅時候記得要隨時留意路面環境。

3. 泊車無限期?

好多時候呢男仔係會揸車嘅時候就好似車神上身咁,但係去到泊車就泊極都泊唔到,就好似片段入面嘅男主角,結果明明準時到都變遲到,所以男士們要做車神,首先要識得泊車。

4. 最後一刻先剎車

唔知點解男仔揸車嘅時候,鍾意拖到最尾1秒先剎車,搞到坐係你隔離嗰個拿手唔成勢,其實早啲收油都唔係咁難姐。