女藝人廖熙琳日本返港冇自我隔離14日仲去試鏡 網民鬧爆播毒

廖熙琳

新型冠狀病毒繼續喺全球蔓延,香港確診病例持續增加。香港政府喺本月19日要求返港人士入境(大陸及澳門以外)要強制接受醫學監測14日。喺前日,有網民喺社交網站透露去試鏡時,遇到一名啱啱喺日本返嚟嘅女藝人,質疑對方去試鏡時並冇自我隔離14天,仲出街參加試鏡播毒。

呢位網民當時問對方有冇隔離,對方仲笑笑口話有,再問佢係咪只隔離咗1至2日,對方就冇再答佢。之後網民再喺IG問呢位女藝人,喺日本返嚟後有冇唔舒服,對方就回答:「有啊,從日本回來後就很不舒服啊。」網民再問對方有沒有隔離14天,亦都有提到隔離14日嘅必要性,點知對方竟然答「你真係儍㗎喎」。

雖然一直都冇提過個女藝人,但邵子風就喺社交網站貼出該女藝人嘅IG並留言:「唉……我做醜人啦……」,仲幫女藝人打格仔。而網民就極速起佢底,呢位女藝人就係廖熙琳(Hillary Liauw)。之後大批網民湧到Hillary IG留言,指責佢嘅行為自私,去完旅行唔隔離之餘仲周圍去。雖然Hillary有道歉,又話自己每日都有量體溫,做試鏡先會出去唔會出去玩,又解釋佢同網民嘅對話。

喺今日下午,Hillary喺社交網站出PO回應事件:「我身體非常的健康,回來後有做自我隔離,也有每天量體溫。沒有強制家居隔離令在身,非必要的社交活動都取消了。感謝朋友們的關心,直至這一刻我身體非常良好,這段時間沒有生病,身體上沒有任何不舒服,大家不用惶恐。對不起。謝謝。」

現年27歲嘅廖熙琳,係浸大表演系畢業生。喺入行初期,廖熙琳主要係參與無綫劇集拍攝,例如《有營煮婦》及《畢打自己人》等等。除咗無綫之外,佢仲有幫ViuTV及港台拍攝。另外,佢仲嘗試唔同嘅幕前工作,參與電影、舞台劇、主持及拍MV,最近佢就為香港開電視拍攝3集《美少女日本民宿》,2月出發,喺3月11日返香港。

廖熙琳
廖熙琳
廖熙琳