女朋友對男朋友嘅好奇心 真係無窮無盡

好多男人都話,女人係一種叫人摸不著頭惱嘅生物;隨咗善變嘅心之外,最簡單就係連思考模式都同男人好唔同。講起最令人驚訝嘅就係佢哋對於男人嘅生活嗰種好奇心。就好似節目入面講嘅一樣,可能有少少誇張,但女朋友Check男朋友身處地點已經係慣常事,甚至每去到一個地方,都要打個咭報到,難怪WhatsApp都要推出位置分享功能。其實男朋友去邊係咪咁重要呢?有時男人嘅嘢,唔係想對你唔住,只係需要少許自由時間啫!咁除咗要男人報告地點以外,仲有咩女朋友好想男友主動公開嘅呢?

電話訊息

係咪好恐怖呢各位男士們?其實好多女士對男友嘅電話有一種無可抗拒嘅魔力,一旦有機會就會忍唔住拎上手,嘗試Check男友訊息。不過話畀女士們知,有啲嘢唔睇好過睇,例如男友嘅手機啦。

男朋友EX

對於男友舊情事,女人又係充滿好奇,唔單止經常迫男朋友講,仲會恨恨記住,一有機會拎嚟捅佢一刀,或者去過邊,送過乜都一定記到實晒;其實作為男人,應該都唔會成日記住EX嘅事,你哋反而成日迫佢諗起,唔好咁啦!

男友財政

未入男家門,有唔少女士都已經充當起事頭婆,希望接管男友嘅財政架喇;不過女士會美其名,話幫佢手儲錢之類,迫佢透露財政情況,每月人工等,然後半推半就男友同佢開聯名戶口儲錢;男士嘅咩玩具音響手錶等興趣?拜拜喇~