【奧斯卡前瞻】最佳男配角變影帝大戰

分別同大家預測過最佳電影及最佳女配角,今日嚟睇睇最佳男配角邊個最有機!一睇個提名名單真係不得了,差唔多位位係影帝,有老行尊如安東尼鶴健士、阿爾柏仙奴,又有公認好戲又揹到票房嘅湯漢斯,粒粒巨星!

但諗深一層,今年值得提名男配角嘅候選人真係咁少咩?明明安東尼鶴健士同湯漢斯分別於《教廷白煙》及《在晴朗的一天出發》都係主角,結果以男配角名義入圍,5個候選人無一個係新人仲要無年輕演員,最後生嗰個已經係57歲嘅畢彼特!Timothée Chalamet喺《小婦人》表現都好好,不過於各大頒獎禮一個提名都無,俾啲機會新一代演員好喎!

雖然無年輕演員角逐,不過唔一定會頒俾資歷深𠴱位。以《愛爾蘭人》為例,雖然係Netflix串流平台出品,不過話哂由大導馬田史高西斯執導夥拍《教父》班底,咁嘅陣容,為表敬意,提名一定有,結果不負眾望入圍多個電影大獎,成為咁多套候選電影之冠,可惜似陪跑多無獎入袋。《愛》佔咗2位男配角提名,似俾面多過贏面。

湯漢斯憑《在晴朗的一天出發》入圍男配角其實幾奇妙。電影雖以編輯洛伊視點出發,但訪問對象、由湯漢斯飾演嘅名主持人羅渣士先係主菜,用訪問對話講述羅渣士人有幾好。電影宣傳品全部以湯漢斯做中心設計,點睇都係男主角!通常真人真事改編,扮得越似真人,越大機會得獎,可能羅渣士太深入民心,呢條方程式今次行唔通。

另一位明明係男主角但入圍男配角嘅仲有安東尼鶴健士,《教廷白煙》原裝英文戲名直譯為「2位教宗」,顧名思義係本篤十六世同方濟各對談,就因為對話場口極多,唔切合大鳴大放先等如好演技嘅奧斯卡標準,安東尼鶴健士再有演技都被視而不見!

男配角大熱由始至終只有一位,就係《從前,有個荷里活》嘅畢彼特。佢同《婚姻故事》嘅羅娜丹一樣,已經分別於金球獎、英國電影及電視藝術學院(BAFTA)、美國演員工會獎、AACTA國際大獎等贏得最佳男配角殊榮,睇勢頭爆冷攞唔到奧斯卡嘅機會微乎其微!只可以話里安納度迪卡比奧腳頭好,同佢做對手戲特別旺攞獎!


估計嬴家:畢彼特《從前,有個荷里活》

個人心水:畢彼特《從前,有個荷里活》


入圍名單 -

阿爾柏仙奴《愛爾蘭人》

安東尼鶴健士《教廷白煙》

畢彼特《從前,有個荷里活》

Joe Pesci《愛爾蘭人》

湯漢斯《在晴朗的一天出發》