【奧斯卡前瞻】扮得似有獎攞 雲妮絲惠嘉影后大熱

香港時間下周一就係奧斯卡金像獎頒獎禮,以往電影得獎往往有利香港票房,不過今年例外,因為大部份入圍電影早已於戲院上映,而且近期受疫症影響,相信大家入場意慾大減,因為少出外為妙。今年奧斯卡直播收視有望回升?

一連5日同大家預測奧斯卡賽果,先後睇過最佳影片、最佳男配角、最佳女配角以及最佳男主角大熱,今日同大家睇埋最佳女主角有咩大熱人選!

查理絲花朗同Cynthia Erivo分別以《爆炸性醜聞》及《Harriet》內嘅女權角色入圍最佳女主角,後者扮演歷史人物Harriet Tubman,以無比勇氣及堅毅解放黑奴,有血有汗嘅革命先峰!本來食住「多元」、「平權」及「女英雌」應該可以大放異彩,可惜電影眼高手低,未能將歷史重要時刻化成深刻作品,反而被人詬病歪曲歷史,大大影響電影聲勢,再而削弱攞獎機會,只能陪跑。

而查理絲花朗同樣扮演真人真事角色,前Fox主播Megyn Kelly,延續#metoo運動加上近日Weinstein性侵案開庭新聞,於話題熱度上冠絕其他入圍影片。佢為名利不擇手段,既係女強人又係受害人,交足內心掙扎戲,唯一敗筆係外型上同Megyn Kelly一啲都唔似,扮真人扮得唔夠「娛樂插班生」,所以成為次熱人選。

至於施嘉莉祖安遜同茜爾莎羅倫都係陪跑居多。因為奧斯卡一向偏愛「真人真事」,扮得同原裝人物越似越有機會成為影后,5個入圍角色得佢兩位係虛構人物,跑出機會大大減弱!25歲嘅茜爾莎羅倫第3度入圍奧斯卡最佳女主角,演技備受肯定,可惜差啲運氣,今年遇著雲妮絲惠嘉上身飾演茱地嘉蘭,應該無望如Jennifer Lawrence咁成為年輕影后。

而施嘉莉祖安遜分別憑《陽光兔仔兵》及《婚姻故事》入圍最佳女配角及最佳女主角,實屬難得,不過攞獎成數唔高,一來受制於「黑寡婦」形象,二來角色太生活化。佢自己宣傳時都有提及籌備《婚姻生活》期間搞緊離婚,因此非常理解角色遭遇!將平凡演得入木三分同有共鳴本來係功架,不過於獎項面前略嫌唔夠力,同唔夠「演戲」。

大熱影后似係久休復出嘅雲妮絲惠嘉。以戲論戲,其實《星夢女神:茱地嘉蘭》好一般,茱地嘉蘭一生高山低谷都走過,可惜套戲平平無奇,不過雲妮絲惠嘉扮演茱地嘉蘭形神俱似,奧斯卡最愛呢類扮真人角色,話之你用特技化妝搭救,總之一望似真人就好大機會有獎攞!

想知影后花落誰家,不妨留意住我哋嘅即時賽果報導!


估計嬴家:雲妮絲惠嘉《星夢女神:茱地嘉蘭》

個人心水:茜爾莎羅倫《小婦人》


入圍名單-

查理絲花朗《爆炸性醜聞》

Cynthia Erivo《Harriet》

雲妮絲惠嘉《星夢女神:茱地嘉蘭》

茜爾莎羅倫《小婦人》

施嘉莉祖安遜《婚姻故事》