【奧斯卡前瞻】影帝之爭 小丑係咪無得輸?

奧斯卡頒獎禮星期日舉行,貴為一年一度影壇盛事,收視率卻每況愈下,換極主持人都救唔到個show!收視低迷相信同觀眾嘅觀影習慣有所改變有關︰一來手機年代,隨時可以重溫賽果及片段,無必要睇現場直播;二來電影唔再只於戲院上映,各大串流平台大戰,大把精彩內容,加上頒獎禮近年賽果無驚喜,對社會議題回應又唔夠,漸漸流失觀眾都不無道理。

今屆最佳男主角賽果幾乎唔駛預測,華堅馮力士(Joaquin Phoenix)一支獨秀,呼聲最高。《JOKER小丑》嘅戲份同人物轉折又得確好有發揮,唯一同佢有機會爭獎嘅應該係憑《婚姻故事》入圍嘅Adam Driver!有趣嘅係華堅馮力士橫掃大型頒獎禮,包括金球獎、英國電影及電視藝術學院(BAFTA)、美國演員工會獎等,但多以影評人選出嘅電影獎包括AACTA國際大獎、女性電影記者聯會(Alliance of Woman Film Journalists)、波士頓影評人協會等則全部輸俾Adam Driver!

以奧斯卡過往紀錄,賽果通常跟貼幾個大型獎項,今次唔例外應該華堅馮力士贏面最大。不過話哂評委人數眾多,由幕前幕後、電影公司高層至低層加影評人都有份投票,唯一暗湧可能輸人緣,據聞華堅馮力士喺片場難相處,唔排除因此流失部份電影從業員票源,仲有班影評明顯唔受落,鍾愛Adam Driver表現多啲,都有少少暗湧。

剩返3位候選人,里安納度狄卡比奧憑《從前,有個荷里活》第6度入圍奧斯卡最佳男主角。2016年憑《復仇者勇》飽受折磨、極度痛苦嘅角色終於贏咗個影帝,今次《從》一角無穿無爛仲做返電影明星,唔駛諗,今年完全無機!

而憑《萬千痛愛在一生》及《教廷白煙》入圍嘅安東尼奧班特拉斯及Jonathan Pryce其實演得極好,尤其安東尼奧飾演嘅名導(艾慕度華自己?)身同心都有病,內心掙扎、痛苦戲好多,不過無扯頭髮、殺人戲份,睇落唔夠dramatic,只能陪跑!Jonathan Pryce更加無機,場場戲都係同安東尼鶴健士對話多,齋talk連電話都唔掟下,好多評審會覺得「無演技」,注定無獎攞。

至於憑《搖滾太空人》獲得金球音樂/喜劇類影帝嘅泰隆艾格頓連陪跑機會都無,而男配角入圍名單同樣偏好資深演員,懷疑奧斯卡同香港一班離地上流人特權階級一樣,仇視年輕男人 - 唔係點會10個提名,除咗Adam Driver(37歲)以外,位位年過45?


估計嬴家:華堅馮力士《JOKER小丑》

個人心水:安東尼奧班特拉斯《萬千痛愛在一生》


入圍名單-

Adam Driver《婚姻故事》

安東尼奧班特拉斯《萬千痛愛在一生》

華堅馮力士《JOKER小丑》

Jonathan Pryce《教廷白煙》

里安納度狄卡比奧《從前,有個荷里活》