奧斯卡公佈評審名單! 劉德華張艾嘉金城武受邀有份投票

美國電影藝術及科學學院(The Academy of Motion Picture Arts and Sciences)喺今日宣布新會員嘅邀請名單,今年新會員數目創新高,一共有928人,分別嚟自59個國家,令總會員名單將增至9,226人。新名單中有不少熟悉的名字,當中包括劉德華,張艾嘉及金城武。如果佢哋接受邀請的話,就會有奧斯卡獎項嘅投票資格。

官網用英文介紹劉德華曾經演出《十面埋伏》及《無間道》;金城武曾經演出《十面埋伏》及《赤壁》;而張艾嘉亦被歸入演員,佢嘅參演作品就係《相愛相親》及《20、30、40》。

除咗佢哋三個之外,較為港人熟悉嘅新名單仲有《與神同行》嘅河正宇、《秘密森林》嘅裴斗娜、《以你的名字呼喚我》(Call Me by Your Name)嘅Timothée Chalamet、荷李活女星莉莉哥連斯(Lily Collins)及碧琪麗莉芙(Blake Lively)等等。

其實近年奧斯卡不斷提高女性會員比例,由15年25%增至今年31%。除此之外,佢哋亦增加亞洲電影人人數,香港過往已經有藝人及電影人獲邀做委員,包括有張曼玉、梁朝偉、劉嘉玲、甄子丹、導演杜琪峯、陳可辛、許鞍華、攝影師鮑德熹及潘恒生等等。