契哥鄭嘉穎教路搶視帝 乖仔馬國明反抗|頭號粉絲|

娛樂

出名乖仔聽話的馬國明,之前被女友黃心穎搓圓撳扁都唔會反抗,對工作亦默默耕耘任勞任怨,唔知係咪被睇中弱點,唔爭又真係冇埋競爭力,多年來在台慶頒獎禮就同視帝無緣齋陪跑。不過,自從被舊愛黃心穎背叛出賣,馬明亦開始醒覺,唔再逆來順受,加上近日契哥鄭嘉穎做軍師從旁教路,昔日與世無爭的他,亦開竅以獎項做目標積極搶視帝。早前被無綫連抽三套劇失去台慶劇光環,以為他又要陪跑,原來馬明仲有後著,年中播出的劇集《白色強人》,收視高口碑好外,他跟無綫的經理人合約,更會在下年約滿,近日無綫落力留人,但他至今未動筆續約,更拖字訣避同無綫傾約,表明要睇埋頒獎禮成績先決定去留,乖仔終極反抗!陪跑多年,馬明都係時候上前鋒!

鄭嘉穎教乖仔馬國明反抗搶視帝

又快到一年一度派發台慶頒獎禮成績表時間,之前台慶劇洗牌《降魔的2.0》被飛出台慶劇之列,《飛虎之雷霆極戰》及《 C9特工》亦被抽起,,以為馬明攞獎機會下跌,原來未到最後一刻,還未知鹿死誰手!據悉無綫今年有意安排《萬千星輝頒獎典禮》在12月初舉行,最有利攞獎成贏家,自然落到正在熱播的台慶劇《解決師》身上,男一王浩信食正天時地利,不過,《解決師》播映至今收視一直徘徊在26點左右,論收視高開兼有口碑佳作,除咗神劇《金宵大廈》,還有年中播出的《白色強人》,令馬明形勢超前。

避同高層接觸

除咗有收視高達32點的大熱作品《白色強人》搶灘,原來馬明仲有王牌喺手,他跟無綫的經理人合約,將於明年屆滿,以往藝人約滿會較佔上風,加上無綫近年小生凋零,對有觀眾緣及收視保證的馬明,更是志在必得,近兩個月無綫已努力留人,不過,出名聽教聽話的馬明,近期就一反常態避同高層接觸傾續約,原來是有「鐵馬」大哥鄭嘉穎教路。

馬國明

馬明09年因拍劇集《鐵馬尋橋》同鄭嘉穎結緣,劇中演馬明大哥的嘉穎,一直被馬明視為大佬,遇到難題,總會向人生經驗豐富的嘉穎攞意見,近日嘉穎便成為馬明續約決策軍師,令昔日與世無爭的馬明,開竅唔再等運到。據知情人士透露:「馬明合約出年下半年就滿,近期無綫好落力搵佢傾約,想佢快啲動筆,但佢就成日話唔得閒,到依家都仲未有時間同高層接觸,同以前好合作嘅態度好唔同!本來馬明份人好踏實,從來唔會扭計,不過,有嘉穎教路之後,佢成個人睇法改變咗,其實當年嘉穎做完《怒火街頭》『籮霸』紅咗,喺內地拍埋受歡迎嘅《步步驚心》,再拍咗幾套大製作內地劇之後,已經唔肯再加簽無綫,知道馬明快約滿,嘉穎亦畀咗好多意見,教佢放眼睇吓外面嘅世界都唔係壞事,亦有勸馬明慢慢諗清楚先決定,所以呢排馬明都為續約事心煩,唔想咁快落決定,咪拖住無綫先囉!佢想過埋頒獎禮先打算!」

冇架子人緣好

由第十四期藝員訓練班出道,轉眼在無綫二十年的馬明,當年同期被封「奧運六星」的成員,除咗他同黎諾懿仍在無綫發展,其餘四子林峯、吳卓羲、陳鍵鋒及黃宗澤都已經離巢,不過留守無綫的他,多年來亦有唔少發揮機會,近年更成為無綫台柱,有過唔少大熱作品彈出,演醫生受歡迎,亦唔係今時今日嘅事,早於12年他已在《 on call 36小時》演才華橫溢暖男「一件頭」人氣急升,不過,贏民心未贏到好運,最終還是同視帝擦肩而過,只能攞到「最受歡迎電視男角色」獎,17年再次有大熱作品《降魔的》又敗給王浩信,上年《深宮計》已是第三次攞「最受歡迎電視男角色」,三度坐歪做二奶。據知情者透露:「咁多年都係陪跑,身邊班『鐵馬』家族成員個個都為佢著緊,其實撐佢嘅又點止呢班兄弟,馬明喺TVB人緣真係好好,佢待人真誠又冇架子,連班幕後工作人員都好撐佢,就連契妹唐詩詠,今年都講明想馬明可以封帝,多過為新劇拍檔王浩信拉票,咁多人為佢打氣,佢的起心肝想攞視帝圓夢,都無可厚非!」

宿敵再交手

唔知係咪天意安排,繼《降魔的》敗給《踩過界》,今年馬明再度同宿敵王浩信交鋒,雖然人緣唔及馬明,不過一直是高層愛將的王浩信,有台慶劇《解決師》加持,他亦瞓身博冧莊,早前更出口術狂晒自己為拍《解決師》動作場面搞到周身傷,賣力拉票不甘示弱,近日又被安排加入邵氏賀歲喜劇《非凡三俠》演出,得公司連環造勢,馬明跑出隨時有變數!

馬國明

延伸閱讀:

傳今年TVB台慶無直播無紅地氈?!重溫過往4年女星台慶紅地氈索爆Look|頭號粉絲|

原來洗衣機分分鐘污糟過馬桶!3招必學!天然DIY洗衣機清洗攻略|真係架點解既好叻呀