《天涯俠醫》深夜重播勾起集體回憶 一文睇清無綫出色醫療劇

《天涯俠醫》(網上圖片)

無綫喺2015年重播經典神劇《大時代》,成功掀起全城深夜煲劇熱潮。自此起,無綫都特別看重深宵重播,搵嚟以前唔少經典劇集喺呢個時段播出,好似有《烈火雄心》、《義不容情》、《壹號皇庭》及《法證先鋒》等等。近日2004年台慶劇《天涯俠醫》就緊接《仁心解碼II》出街。其實過往無綫都有唔少經典醫療劇,大部分都叫好叫座,唔少更被網民稱為神劇,不如而家就同大家回顧一下無綫經典醫療劇啦!

《天涯俠醫》

劇集由張家輝、林峯、郭羨妮、唐寧及黃宗澤等人主演,仲邀請到梁詠琪及盧巧音客串。除咗卡士強勁之外,劇集係無綫首次亦係唯一以無國界醫生為藍本及落重本遠赴東非肯雅和廣西取景。劇情主要講述醫生王甫芬(張家輝飾)為咗完成女朋友夏曉彤(梁詠琪飾)嘅遺願,於是加入國際救援組織「生命動力」(Life Force),其後開設以基層為對象嘅龍城醫療中心,王甫芬因為性格幽默又開朗,所以被稱為「草龍醫生」。之後,佢跟隨救援組織去到肯尼亞工作,期間認識醫生齊百恆(林峯飾),更感染到佢加入醫療中心。劇中有唔少救急扶危嘅緊急場面,當中用汽車電壓做心臟電擊器,及用草當麻醉劑等場面,令觀眾睇到嘆為觀止。

《天涯俠醫》(網上圖片)

《妙手仁心》

如果要講最經典嘅醫療劇,相信唔少人都會答係22年前嘅《妙手仁心》。劇集係無綫第一套以醫療作為題材嘅劇集,演員搵嚟吳啟華、林保怡、蔡少芬、陳慧珊、蘇永康、張家輝、馬浚偉及陳芷菁等人主演,呢個卡士真係不得了。唔少劇中角色深入民心,至今仍然令人留下深刻印象,例如吳啟華飾演嘅醫生程至美(Paul)、林保怡飾演嘅醫生黎國柱(Henry)及蔡少芬飾演嘅醫生唐姿禮等等。另外,劇集由醫院、急症室、甚至儀器全部都係真嘅,每晚嘅拍攝都會有醫生在旁指導,當時唔少觀眾都大讚製作認真。劇集大受歡迎,先後喺00年及05年開拍續集及第三輯。

《妙手仁心》截圖

《On Call 36小時》系列

2012年嘅《On Call 36小時》,由馬國明、楊怡、羅仲謙、黃智雯及袁偉豪等人主演,劇情主要講述香港公立醫院規定醫生每次當值時間為36小時,各醫科部門嘅醫生點樣為生命爭分奪秒,當中仲有唔少緊張嘅手術場面。另外,劇集仲用咗真實嘅醫療設備及場景拍攝,製作絕不馬虎。主題曲《連續劇》更搵咗唱得之人容祖兒主唱,就算而家聽到「情人們一呼一吸相愛到底......」,大家都會記得係呢套劇嘅主題曲。劇集收視及口碑非常不俗,所以無綫好快就推出續集《On Call 36小時II》,仲搵咗吳啟華回巢拍攝。

《On Call 36小時》截圖

《仁心解碼》系列

由方中信、黃智賢及徐子珊等人主演嘅《仁心解碼》,劇情主要圍繞精神科,講述精神科高級醫生高立仁(方中信飾)與重案組警員莫敏兒(徐子珊飾)合力查案及破案。高立仁其後仲同患有家族遺傳精神分裂症嘅莫敏兒拍拖,其後結為夫婦,不過可惜最後都係陰陽相隔。除咗幫手破案之外,劇中都有唔少精神科醫生嘅工作日常及前所未見嘅案件,劇情夠晒新鮮及緊張刺激,唔少觀眾都大讚好睇。之後,劇集開拍續集《仁心解碼II》,不過女主角就由徐子珊換上楊怡同蒙嘉慧。

《仁心解碼》系列

《白色強人》

《白色強人》做得上年嘅皇牌劇集之一,演員陣容當然不容忽視啦!劇集搵嚟一班視帝視后助陣,有郭晉安、唐詩詠、李佳芯、馬國明、何廣沛、蔣志光及馮盈盈等人主演。劇情方面,除咗講述醫生救急扶危之外,仲會探討香港醫療制度、社會議題及醫院嘅權力鬥爭。劇集深受觀眾喜愛,喺《萬千星輝頒獎典禮2019》獲得「最佳劇集」,提名過12次視帝嘅馬國明,終於憑角色唐明登上視帝寶座。無綫早前已經落實開拍續集,有指將於今年10月開拍,不過女主角之一嘅李佳芯 (Ali) 因上年嘅政治風波遭無綫雪藏,所以冇得留低拍續集。

《白色強人》劇照

《跳躍生命線》

《跳躍生命線》搵嚟回巢嘅馬神馬德鐘做男主角,帶領何廣沛、劉佩玥、張曦雯及羅天宇等人主演,劇集雖然唔係以醫生或者護士作題材,不過救護員亦屬於醫療劇之一。劇情主要圍繞救護員生涯,同埋佢哋每日爭分奪秒救援嘅情況,當中有唔少充滿真實感嘅救急扶危場面,唔少人都大讚劇集寫實有誠意。另外,唔少劇中演員亦發揮出水準,例如飾演暖男救護員「雄姐」嘅張彥博。

《跳躍生命線》劇照