天光收工睇餵奶 羅仲謙打餐懵捱到瘦

東方日報
羅仲謙拍攝被槍指嚇的戲份,撻落軟墊唔怕整親。

羅仲謙日前與滕麗名在土瓜灣為無綫新劇《陀槍師姐2020》取景,謙仔拍攝一場被人用槍指嚇的戲份,他坦言今次是他從影以來最多動作戲的劇集,加上天氣炎熱,搞到瘦咗:「呢幾日都通宵,返到屋企啱啱天光,睇埋BB食飽奶就瞓。(順便餵埋?)返到去老婆都餵緊。」

抖夠再追B

本周日是他做老竇後首個父親節,謙仔坦言未知有沒有假放:「其實我冇乜慶祝父親節,早排BB唔舒服,我覺得最緊要小朋友健康。以前未做爸爸,會話人『使乜咁緊張』,依家就算生粒暗瘡、有聲咳,我都會緊張!」問到楊怡是否很擔心,他即大讚對方是「全能媽媽」:「雖然有陪月,但佢學咗八、九成。(準備生第二個?)要休息最少8個月至一年。」

至於滕麗名以一身運動裝示人,飾演陳三元的她笑說:「我咁高級,唔係要我打呀!」但就自爆有另一大挑戰,就是要說泰文對白,該場口講述她做臥底深入虎穴,她笑說:「我依家發夢都識講泰文!」

滕麗名自誇「高級」,所以在劇中唔使打。