大隻佬The Rock加盟DC漫畫電影 化身超強Black Adam

DC本來係個漫畫界大寶庫,可惜近年作品改編成電影表現未如人意,電影公司近年痛定思痛,改善英雄電影劇本,仲狠心大換血!為著名角色例如蝙蝠俠、超人及小丑重新選角,銳意重新打製DC漫畫電影系列。

同一時間佢地仲努力發掘新英雄搬上大銀幕,《神奇女俠》、《水行俠》、《沙贊!神力集結》等皆獲得理想票房成績,唔止角色有新鮮感外,不得不承認電影公司選角有一手。幾位主角本來知名度一般,不過極有觀眾緣,仲憑DC英雄角色大紅!

今次搵嚟本身人氣、觀眾緣及票房揹飛能力都極高嘅「The Rock」Dwayne Johnson做Black Adam一角,可見電影公司野心幾大,想將Black Adam打製成另一個「超人」!Black Adam身世喺DC漫畫中改寫過幾次,不過點改都同沙贊有密切關係。佢本來係古埃及王子,一心守護家園而獲得沙贊神力,後來因為能力而腐化,沙贊奪回賜予嘅神力,但Black Adam已經從埃及神上獲得強大力量,成為DC中能力可比超人嘅強敵!

睇佢身世都知佢係歹角,不過佢嚟到現代又壞唔哂。連Dwayne Johnson喺自已IG都有講,佢自細祟拜超人嘅正直同為正義而戰,但個性叛逆嘅佢知道自己做唔到超人咁偉大,反而黑衣打扮嘅Black Adam更切合佢性格︰不理世俗規條,面對不公義時,會用自己嘅法則譬如武力教訓衰人,為市民爭取真理與公義。

由歹角變英雄嘅角色設定,其實更貼合本身形象正面嘅The Rock。Black Adam有望成為合家歡大小通吃英雄電影,據聞因為The Rock吸票房能力極強,電影公司會用到盡,將Black Adam擺埋落其他DC超級英雄電影,《沙贊!神力集結》系列一定有份之外,仲有機喺《水行俠》中露面。嘩!屆時2位大隻主角同場實會迫爆螢幕!