《大醬園》四位當家太太 邊位保養得最好?

由何廣沛及朱晨麗擔正嘅無綫新劇《大醬園》,喺今個星期一開始播出。劇集以豉油為題材,劇情主要講述一個民初時期大醬油家族嘅恩怨情仇。講到明係大醬油家族,所以劇集就搵嚟吳岱融、鄭子誠、陳嘉輝及徐榮分別飾演萬冠園嘅四大當家。既然有四位當家,咁當然有四位當家太太啦,佢哋分別係龔慈恩飾演席德容、車婉婉飾演趙靈素、郭少芸飾演張笑瑩及樊亦敏飾演嚴瑛,佢哋各具性格及特質,仲要保養得宜,唔知大家又認為佢哋邊位keep得最好呢?

萬家大太太席德容(龔慈恩飾)

現年55歲嘅龔慈恩,喺劇中飾演大當家萬啟山(吳岱融飾)嘅夫人席德容,與萬啟山係一對恩愛夫妻,佢賢良淑德、處處為老公著想、持家有道,間唔中仲要應付三位難搞嘅弟婦。

《大醬園》劇照

萬家二太太趙靈素(車婉婉飾)

現年45歲嘅車婉婉喺劇中飾演萬家二太太趙靈素,與「御用奸人」鄭子誠飾演嘅二當家萬啟石係一對夫妻,同得鄭子誠做一Pair,佢點會善良得去邊呢?!佢喺頭兩集已經以為萬家三太太(郭少芸飾)不守婦道,與張勇(張達倫飾)鬼混。佢仲叫齊人去捉姦。

《大醬園》劇照

萬家三太太張笑瑩(郭少芸飾)

現年51歲嘅郭少芸喺劇中飾演萬家三太太張笑瑩,今次唔再係同鄭子誠一pair,而係與陳嘉輝飾演嘅萬啟川係一對夫妻,佢同老公一樣為人比較老實,淨係喺頭幾集,佢已經被二太太串同以為佢不守婦道。

《大醬園》劇照

萬家四太太嚴瑛(樊亦敏飾)

現年48歲嘅樊亦敏,今次再一次飾演有錢人太太,與萬家四當家萬啟江係一對恩愛夫妻。原本係上海上流社會嘅名媛,性格比較巴辣,不過其後嫁到南方,所以佢滿口上海口音,仲不時會以洋裝打扮示人。

《大醬園》劇照