《大醬園》前晚首播 網民反應好唔好?

《大醬園》劇照

無綫賀歲新劇《大醬園》以豉油為題材,主要講述一個民初時期大醬油家族嘅恩怨情仇,同埋一個身份卑微嘅女人點樣喺男權當道嘅世代下闖出一片天。劇集喺前晚首播,等我哋一齊睇下網民有咩反應啦。

劇集類型吸引

金牌監製梁材遠告別作《大醬園》主要係圍繞住醬油業百年老字號「萬冠園」所發生嘅事件,呢類題材令到唔少人聯想起佢昔日嘅經典作品《茶是故鄉濃》及《酒是故鄉醇》。家族嘅恩怨情仇劇一向都係觀眾杯茶,以往唔少呢類題材嘅劇集收視同口碑都唔錯。另外,除咗家族鬥爭之外,劇集仲加入新元素,例如女性主義、神怪及奪寶等等。唔少網民都表示劇集類型吸引,同埋好期待。

《大醬園》劇照

搶鏡過男女一

今次劇集搵嚟何廣沛及朱晨麗擔正做男女一,雖然佢哋都係靚仔靚女,望落相當吸睛,不過就好似唔夠佢哋身邊嘅演員搶鏡,例如萬冠園嘅四大當家,大當家萬啟山(吳岱融飾)、萬家二當家(鄭子誠飾)、萬家三當家萬啟川(陳嘉輝飾)及萬家四當家萬啟江(徐榮飾)。喺噚晚嗰集「御用奸人」鄭子誠已經跣醬油廠,劇情講到佢就不滿龔慈恩偏心,所以就算個天突然落大雨,佢都唔理會豉油被淋濕。淨係睇呢班中佬已經值回票價,所以唔少網民都話好期待吳岱融同鄭子誠嘅演出。

《大醬園》劇照

係唔係《丫鬟2》?

《丫鬟大聯盟》喺上星期大結果,不過今次《大醬園》都有唔少演員有份喺《丫鬟大聯盟》演出,例如鄭子誠、郭少芸及陳婉婷,連兩套劇嘅主題曲都係由譚嘉儀主場,難怪有網民笑問係唔係《丫鬟2》啦!

佢哋又做情侶

今次劇集搵嚟唔少大家喜愛嘅螢幕情侶演出,何廣沛及朱晨麗繼《超時空男臣》後再度飾演歡喜冤家,黃嘉樂及江嘉敏就繼《果欄中的江湖大佬》再次有感情線,而吳岱融及龔慈恩就仲犀利,佢哋今次已經係第三次(之前兩次分別係《牛下女高音》及《贏單傳奇》)飾演夫妻,令劇集吸引力大增。

《大醬園》劇照

演員連踩幾套劇(樊亦敏)

近年無綫鬧演員荒就係人都知,不過劇中有唔少演員連踩兩套,甚至三套劇集。兩套劇嘅有吳岱融、張達倫、陳嘉輝、楊卓娜、阮政峰及袁文傑等等,而連踩三線劇集嘅就有樊亦敏及甄穎珊。最搞笑嘅係樊亦敏喺三套劇都係飾演有錢太太,不過喺《大醬園》中飾演嘅四當家夫人嚴瑛,佢原本係上海上流社會嘅名媛,所以不時會以洋裝打扮示人,不過就滿口鄉音,雖然佢好努力扮呢啲鄉音,不過網民就唔係好受落,仲覺得有啲煩添呀!

《大醬園》劇照

龔嘉欣民初look好正

龔嘉欣喺劇中飾演葉細么,佢自細就同夏小滿(朱晨麗飾)相依為命,不過之後佢會為上位,壞事做盡,利用身邊嘅人,當中包括夏小滿。唔少網民睇咗兩集都紛紛大讚佢好靚及民初造型好得。

《大醬園》劇照