《大醬園》下星期首播 細數無綫食物題材劇集

無綫新劇《大醬園》下星期一首播,今次劇集以豉油為題材,講述大醬油家族嘅恩怨情仇。無綫一直以來都有好多劇集以食物做題材,等我哋同大家一齊重溫啦!

《大醬園》- 豉油 

由朱晨麗、何廣沛、吳業坤及龔嘉欣等人主演嘅民初劇《大醬園》,以三十年代大醬油家族為背景,帶出家族恩怨及年輕人為理想而奮鬥嘅故事。

《溏心風暴》- 鮑魚

《溏心風暴》中嘅溏心即係「溏心鮑魚」,劇情主要講述唐記海味舖老闆唐仁佳(夏雨飾)坐擁六億身家,原本大好嘅唐家因為爭產風波而搞到四分五裂,兄弟反目成仇。劇集叫好叫座,仲創造出唔少經典金句,令一班師奶觀眾好受落。

《溏心風暴之家好月圓》- 月餅

《溏心風暴之家好月圓》收視高企,延續煲劇熱潮。劇集以中秋節及月餅為主題,主要係叫人要珍惜屋企人,珍惜中秋團圓嘅日子。恩愛夫妻「Jo爸」甘泰祖(夏雨飾)及鍾笑荷(李司棋飾),因為「小三」殷紅(米雪飾)搞到離婚,仔女被逼各散東西。就算仔女長大,但殷紅都麼放過荷媽一家,最終令Jo爸及荷媽重修舊好。

《溏心風暴3》- 奶茶 

《溏心風暴3》仍然都係講草根崛起、家庭矛盾吵架為主。今次以茶餐廳為故事背景,奶茶王為恩公而幫忙兩間公司合併,助恩公渡過難關,後來變成富豪家庭爭產。

《茶是故鄉濃》- 茶葉

劇集由林家棟、張可頤、蘇玉華及麥長青等人主演,以清末民初為背景,更山長水遠到廣西賀州拍攝,取景地點景色優美,又講咗好多種植茶葉、採摘、炒茶葉等整作過程。

《酒是故鄉醇》- 酒

《酒是故鄉醇》係《茶是故鄉濃》嘅姊妹劇,劇集搵嚟林家棟、佘詩曼、鄧萃雯、馬德鐘等人主演,背景係清末民初,以造酒為題材,講述酒坊內爾虞我詐,人人都覬覦酒坊當家之位。劇組為求逼真,當時仲去到廣西等多個地方拍攝,絕對係大製作。

《美味情緣》- 海鮮

2001年嘅劇集《美味情緣》係一部同海鮮有關嘅美食劇,除了內容海鮮有關,連人名都係海鮮,男女主角吳啟華叫馬友,馬德鐘叫龍賜新,陳慧珊叫喬花枝,滕麗名叫蘇眉,完全配合套劇。

《巨輪》- 花生糖

劇集除咗講羅威信(蕭正楠飾)及喬天生(陳展鵬飾)嘅兄弟情之外,就講述羅威信喺澳門開檔賣花生糖及薑糖,由街邊擺檔維生,經過多次改良,後來開第一間店鋪,之後再喺澳門及香港開設分店。

《情迷黑森林》 - 蛋糕

劇集講述唐霜(胡杏兒飾)與高根(馬德鐘飾)曾經發生誤會,之後加入高根嘅蛋糕屋報仇,最後當然知道誤會咗馬德鐘啦,仲幫佢重振聲威,兩人亦成為情侶。劇入面嘅蛋糕都整得好靚,隔住電視都覺得好好味。

《魚躍在花見》- 壽司 

由張智霖、謝天華、胡杏兒、劉松仁及楊怡主演嘅《魚躍在花見》,以壽司店為主題,劇集入面介紹左握壽司、漁貨及買手等等,亦專程到日本北海道拍攝,令觀眾進一步了解日本壽司業。