大熱音樂劇The Prom拍成電影 梅麗史翠普拍4星跳唱撐sheshe女生

「梅姨」梅麗史翠普繼《媽媽咪呀》後,再度接拍音樂劇!新片The Prom演出陣容強勁,有樂壇小天后Ariana Grande;節目玩car pool karaoke玩到出哂名、好唱得嘅名嘴James Corden;仲有影后妮歌潔曼同《我的超豪男友》Awkwafina主演,選角非常用心。除咗星光夠燦爛外,5位主角分別拍過歌舞劇同出過唱片,同音樂絕對有關係!

The Prom音樂劇上年先喺美國百老匯登場,大受歡迎仲獲得舞台劇重要大獎Tony Awards 7項提名,包括最佳音樂劇、最佳原創音樂、最佳男女主角(音樂劇)、最佳導演等,得到觀眾同專業評審嘅肯定,故事質素有保証,難怪齣音樂劇仲咁新就極速被Netflix改編成電影,仲落重本搵大星參演!

電影講述2位舞台戲骨Dee Dee Allen(梅姨 飾)及 Barry Glickman(James Corden 飾)因為受歡迎程度大不如前,票房失利,決定搵公關Sra. Sheldon(Awkwafina 飾)幫幫手重新包裝形象。做慈善最易有光環,又要吸引班後生,所以2個老戲骨決定去幫Emma ─ 一個因為要帶女朋友去畢業舞會,導致成個畢業舞會被取消嘅高中女生。

妮歌潔曼則會飾演另一個幫手做慈善嘅音樂劇演員Angie Dickinson,幾個演員借助媒體曝光,加上輿論壓力,終令原本取消嘅舞會得以舉行,不過得Emma一人參加!因為班怪獸家長早已安排同日另一地點舉辦畢業舞會!

呢個時侯老戲骨現真身,只係擔心一人舞會對形象唔好,而非真心想幫Emma!最後解決方案,係班後生投票決定開個大愛包容嘅舞會,齊齊玩一個都不能少,而班家長、老戲骨只能出錢支持!小天后Ariana Grande傳聞將會出演Emma 嗰位尚未出櫃嘅萬人迷女友Alyssa。

電影版將由《吉列合唱團》、《再單身遊記》編劇Ryan Murphy負責改編,佢一向擅長討論女性及小眾議題。電影版The Prom劇本有一定保証,加上Netflix未開拍已經宣佈會先喺戲院上映,之後先上Netfix自家串流平台,似為攞獎作準備,會唔會成為第二套《羅馬》?值得期待!