大導x諾貝爾獎得主 馬田史高西斯拍卜戴倫紀錄片

傳奇音樂人卜戴倫(Bob Dylan)係詩人、民謠歌手、搖滾詩人、演員、基督徒,又有人形容佢係社會激進份子、長年隱居,私生活低調,連諾貝爾獎頒文學獎俾佢,佢都無現身回應,只係喺得獎辭答謝,仲幽幽咁問咗句「我嘅歌算文學嗎?」(Are my songs literature?)

卜戴倫無明確表明其政治立場,不過作品都被解讀成內藏政治隱喻,好似成名作《Blowing’ in the wind》挑戰當時美國右翼,《The Time They Are A-Changin’》意指平權運動等。佢早於60年代接受訪問時表示佢只想紀錄文字,而無辦法決定或左右人們嘅解讀。

作品背後真正意義可能得卜戴倫本人先知,多年嚟事業上有唔少爭議,早期以民謠走紅嘅佢突然轉玩搖滾曲風、中途又出過3張福音味濃嘅專輯,近年因為無就美國出戰伊拉克作出指控而被指為「政治冷感」、「離地中產」。面對批評聲音,佢鮮有接受媒體訪問作出澄清。

真實嘅卜戴倫係個咩人?集多種面貌於一身?還是「神人」只係出於大家嘅想像?金像大導演馬田史高西斯對於呢個問題都好有興趣,所以親自執導咗紀錄片Rolling Thunder Revue: A Bob Dylan Story by Martin Scorsese,仲請得郁卜戴倫本人現身解說!

電影圍繞卜戴倫於1975夏天舉行嘅巡迴演唱會,當時極受歡迎嘅佢一反傳統,決定於偏遠地區及細小場地進行巡迴演唱,又戴上各式各樣面具,甚至油白塊面上台表演。就票房而言,個巡迴成績好差,不過當時個星光熠熠嘅陣容Joan Baez、Joni Mitchell同Sharon Stone就真係可一不可再,擴大咗卜戴倫嘅事業版圖。

雖然一套紀錄片唔足以代表完整嘅卜戴倫,不過藉此窺探呢位殿堂級音樂人,了解音樂如何影響及成為幾代人嘅文化精神食糧!預告片中卜戴倫話「生命不在於找尋自己,而在於創造自己」(Life isn’t about finding yourself or finding anything. Life is about creating yourself)。各位,放膽勇敢咁表達自己嘅想法,創造自己,創造未來。