《多功能老婆》噚晚首播 網民反應如何?

今年最後一套台慶劇《多功能老婆》喺噚日(25日)首播,劇集陣容都尚算不俗,除咗有闊別無綫劇集多年嘅楊千嬅做女一之外,仲有黃浩然、陳煒、周柏豪及朱晨麗等人參演。想知網民們睇完有咩感受,快啲轆落去睇下啦!

第一集節奏尚算明快

劇集播出一集,唔少網民都覺得套劇嘅節奏比平時劇集唔同,第一集已經表達晒所有人物關係圖。藍飛(楊千嬅飾)以為老公尚劍雄(黃浩然飾)送出豪宅係對自己愛護有加,而藍飛亦有兩位金蘭好姐妹,萬風華(陳煒飾)及馬思蕾(朱晨麗飾)。當藍飛自以為自己好幸福之時,與兩位閨密準備去日本旅行於機埸就發現原來自己同老公早已出現第三者(陳庭欣飾),第三者公然挑釁藍飛。藍飛決定照去日本,緣份令佢認識到與女友蘇蝶(吳若希飾)鬧分手嘅榮浩田(周柏豪飾),事情真係就係咁巧合。

《多功能老婆》劇照


拍攝手法同其他劇集唔同

4K拍攝手法,有人接受有人唔接受。之前嘅《不懂撒嬌的女人》就係首部無綫電視以4K全實景製作嘅電視劇。普偏電視劇大多數為2K,今次以四倍解像度播出,感覺更真實更高清。雖然有電影感覺,不過畫面顏色較為偏白,令人睇落冇咁舒服,睇嚟要拍出一套好4K電視劇,較白平衡及打燈要再落更多功夫了。

三位選美冠軍

今次《多功能老婆》搵嚟唔少靚女演出,例如有三位選美冠軍助陣,分別有陳煒(瑋哥)、朱晨麗(朱朱)及陳庭欣(Toby)出場。佢哋今次劇集裡更有泳裝戲出現,大家睇頭絕對不少,真係令人十分期待。

《多功能老婆》劇照

楊千嬅有啲殘

唔知係咪套劇有好多保養得宜嘅女藝人,已經唔再係十八廿二嘅千嬅望落有啲殘,顯得格外老。另外,千嬅於今年八月,喺微博貼文表現「愛國」立場後,唔少網民都話要罷睇佢嘅電視劇。

《多功能老婆》劇照

楊千嬅與黃浩然樣貌唔合襯

今次楊千嬅拍住同佢一齊17年前有份拍《新紮師妹》嘅黃浩然!當年樣子仲好青瀝嘅千嬅同現時對比真係比較大分別,加上千嬅現時樣子較硬正較剛強。偏偏黃浩然仲好似越來越後生,好有魄力,兩位飾演夫妻的確有啲唔襯。

《多功能老婆》劇照