《多功能老婆》今首播!重溫楊千嬅拍過嘅無綫劇集

《多功能老婆》劇照

重頭台慶劇《多功能老婆》喺今晚隆重首播,劇集演員陣容強勁,除咗搵嚟楊千嬅做女主角之外,仲搵咗周柏豪、黃浩然、朱晨麗、黃錦燊、洪永城、陳煒及吳若希等等參演。楊千嬅闊別無綫劇集17年,不如而家就同大家重溫一下千嬅過往拍過嘅無綫劇集啦!

2001年《美味情緣》

當年無綫神劇之一,搵嚟多名青春派藝人,再加有經驗嘅吳啟華、馬德鐘、陳慧珊及滕麗名。本身四位經驗演員已經可以令劇集有穩定收視,再加上林峯與千嬅喺劇集飾演一對情侶,表現得既可愛又鬼馬。另外,劇集主題《美味情緣》及插曲《快樂與哀愁》都係由千嬅主唱。

1998年《外父唔怕做》

留下一把長頭髮充滿少女味嘅千嬅,既可愛又青澀,今次擔大旗成為女主角,劇中與張家輝飾演情侶及夫妻,而秦沛就飾演千嬅爸爸。

1997年《隱形怪傑》

《隱形怪傑》係1997年嘅台慶劇,千嬅喺劇中飾演一位同佢真實性格有幾分相似嘅區珊珊,性格「大笑姑婆」得嚟帶點可愛,望住佢嗲哥哥真係好搞笑。

1997年《美味天王》

《美味天王》同樣貴為1997年台慶劇,當年搵嚟歐陽震華、關詠荷、宣萱、古天樂及張可頤等人主演,而千嬅喺劇中飾演古天樂(古仔)嘅前度女友,雖然戲份唔多,但短頭髮傻更更嘅樣已經令人深入民心。