【外語930】連奇洛李維斯自已都好鍾意嘅《魔間行者》

近日奇洛李維斯為配合《殺神4》宣傳,密密做咗好多訪問,其中談及最愛經典角色,佢提起己14年前自舊作《魔間行者》,仲話好鍾意角色John Constantine同其中嘅電影世界。訪問一出引起網民暴動,仲話要齊齊夾錢開拍續集咁話,呢套電影當年上映時票房唔算特別標青,只可以話時不與佢,今時今日睇返《魔》都仲係咁正!

除咗奇洛李維斯當年戲中造型極靚仔有型外,故事改編自漫畫《Hellblazer》,以天、人、魔為背景亦相當有睇頭!故事講述天生靈異體質嘅Constantine(奇洛李維斯飾)自少睇到天使、魔鬼,飽受困撓嘅佢因此而自殺但不果,來回地獄又折返人間後,佢決定成為驅魔人,希望藉此死後上天堂。

一日,他在追查靈異事件時遇上女警Angela(麗歌維絲飾),她對孖生姊姊自殺一案感到疑點重重,堅信妹妹被謀殺。這個原本不相信鬼神的女警在康斯旦丁的帶領下,見識了來自地獄的恐怖,旋即捲入了一場人、魔、神之間嘅鬥爭。

Constantine戲中因為牛鬼蛇神見太多,又憤世嫉俗,所以經常煙酒唔離身,官仔骨骨得嚟又帶啲頹廢美,為救Angela一人隻揪一打魔鬼,仲自我犧牲,好鬼型。仲要以人嘅身份單挑天使與魔鬼,同魔界大佬撤旦講數兼舉中指一幕極經典!驅魔人電影睇唔少,怕且得Constantine一個咁無畏無懼,打大佬都不失冷靜!

另外,天界代表Gabriel由本身仙到唔似人嘅Tilda Swinton飾演,將大天使嘅中性、仙氣,亦正亦邪嘅氣質發揮得淋漓盡致,結尾被神折翼貶落凡間,眼神空洞滿面難以置信,pure得嚟又想打佢一身,冰冷表情完美演繹出天使形象,十足十從博物館油畫行出嚟咁!

睇《魔》仲會發現0靚仔時代嘅Shia LaBeouf,飾演負責車Constantine出出入入嘅跟班Chas,可惜戲中第一次出任務就陣亡,所以拍續集都唔會再見到佢。

《魔間行者》當年喺香港上賀歲檔……你無睇錯,片商真係用一套又有自殺又有魔鬼、極多唔「老黎」元素嘅戲嚟賀年,奇洛李維斯同導演Francis Lawrence仲親臨香港出席首映禮,個個為咗睇男神,人山人海逼爆銅鑼灣咁滯!由此証明男神魅力沒法擋,只要你係奇洛李維斯,過年習俗都要行埋一邊!