【外語930】煲晒《愛的迫降》 睇 《JSA安全地帶》南北韓男人友情

相信唔少朋友都中咗《愛的迫降》毒,沉迷玄彬飾演利正赫時而嘟嘴表情,孫藝珍飾演嘅尹世理能幹多金又靚女,仲加上一班個性純真嘅小隊成員,喺前境未明嘅當下,確實睇得人心花怒放,暫時忘憂!

現實世界中嘅南北韓關係好似無咁美好,雖然金正恩同文在寅喺板前店握哂手,不過現實如果有位不明女子突然跌落北韓邊境,應該唔會遇到玄彬,但軍人就一定會遇到,調查過程發生咩事真係無人知,條命分分鐘凍過水!《愛》主線係俊男美女可歌可泣愛情故事,美化情有可原。

北韓又係唔係報導中咁兇險?今日想同大家重溫2000年由朴贊郁導演執導嘅《JSA安全地帶》,朴導通過電影描寫咗就算兩國對立,人與人之間都有友情,唔係非黑即白嘅敵對狀態。電影上映時被批評美化南北關係,不過其中一幕南韓軍人出於關愛,幫北韓軍人擦鞋一幕,當年對南韓觀眾嚟講都幾震撼!

 1950年韓國內戰,形成南北韓對峙,後於1953年於板門店簽訂休戰協議,兩國於邊界線各劃出兩公里為非軍事地區,此地區為安全地帶(Joint Security Area)。《JSA安全地帶》講述某夜2名北韓哨兵被發現中槍致死,伏屍地點是南北韓共同警備區。這件事挑起南北韓之間的仇恨。北韓指責南韓企圖作出恐怖偷襲,而南韓則指控說是綁架。兩岸決定委任由瑞士及瑞典組成之「中立國監督委員會」介入調查此件凶殺案。

調查初期遇到重重困難,因為南北韓兩方面都拒絕合作,不願意引渡證人進行調查。幾經辛苦後發現可疑的南韓士兵,立即展開調查。就在此時,關鍵證人自殺身亡……

電影圍繞住調查員張蘇菲(李英愛 飾)、南韓軍人李壽赫(李炳憲 飾)、南成植(金太祐 飾)與北韓軍人吳景弼(宋康昊 飾)及 鄭宇真(申河均飾)展開,雖然牽涉軍事調查,不過戲內無咩槍林彈雨場面,反而有少雙方軍人、男人友情嘅描述,南北兩邊對當晚事故描述不一,出現羅生門,亦係出於對友情嘅考量與保護,最後甚至以自己性命贖罪。

《JSA安全地帶》同《愛的迫降》都有相似嘅地方,就係北韓軍人都好樂於助人,《愛》嘅利正赫冒險保護來歷不明嘅陌生女子,《JSA》嘅吳景弼遇著踩中地雷嘅李炳憲,無即時處決佢,仲幫佢拆彈!

電影、劇集同現實到底有幾多分相似就不得而知,但係冇出街睇完《愛的迫降》嘅劇迷,JSA好能夠幫你止止渴,畢竟套戲本身水準唔錯,亦可以話係韓片打入香港市場嘅先頭部隊。原來只係20年,南韓就足以產出好多套亞洲大熱劇集、KPOP偶像同埋一套奧斯卡最佳電影!