外語930:《波兒出城之妖壇教祖三點"畢露"搞硬美國佬》

今個星期好想睇啲瘋狂電影,諗起英國癲喪才子Sacha Baron Cohen。叫佢才子因為人地係劍橋歷史系畢業,跟過大師學戲,兼且以自編自導扮嘢電視節目起家。佢以偽紀錄不文笑片諷刺社會大小事,2006年《波叔出城:哈薩克鄉下佬去美國搵著數》全球狂收20億,波叔做盡唔少奇怪事,令美國人側目,以「波叔」呢個虛構人物,笑返美國人無了解其他國家文化!

今日介紹嘅《波兒出城之妖壇教祖三點"畢露"搞硬美國佬》,有更多裸露同過份鏡頭,今次Sacha Baron Cohen化身波兒,身為時裝騷主持,諗住直擊米蘭時裝周,點知一擊即時搞「禍」個騷。

俾監製豉椒炒魷的波兒深信自己魅力沒法擋,此地不留人,自有留人處。決定同助手路仔一同闖盪阿美利堅做超級巨星。要紅一定要夠曝光率,波兒積極出席各大小名人專訪節目,由真人騷明星至政客大小通殺,並且大騷本錢同「細佬」以答謝觀眾,激到嘉賓以拳頭相報。

一心想成名嘅波兒去到美國,做配角太有戲被人炒、自製節目被評為垃圾都不如,喺非洲用iPod換個黑人BB返嚟收農,但同埋個B一齊酒池肉林,做盡連美國人都頂唔順嘅無知行為!最後人又無、B又無嘅佢,覺得問題癥結在於佢係基,於是走去學做直男:軍訓、打獵、釣魚同去雜交派對!最後高潮位,梗係喺成班「護家盟」面前同男助手搞嘢,成為各大新聞頭條而終於紅咗!

成套《波兒出城》充滿大量政治不正確又粗鄙嘅笑點,就算畫面打哂格仔都遮唔住佢有幾露骨,不過Sacha Baron Cohen唔係為咗賺錢埋沒良心求其拍套戲,反而係借笑片形式講政界人士、弱勢社群、少數族裔等議題,唔係都請唔郁一班對世界有要求、敢為公義發聲嘅巨星Bono、Sting、Elton John等同佢一齊癲。

笑完80分鐘後,靜一靜回個神,你會發現要拍得成《波兒出城》,其實需要大量資料搜集,無返咁上下了解,邊放大到啲錯到離譜嘅現實出嚟!睇埋Cohen最新嘅Who’s American?你就明我講咩!