【外語930】大跌市睇《孖展風雲》 喺辦公室拍出腥風血雨

近日因為疫情影響,內地多個行業,包括唔少工廠停工,直接影響全球貨物供應鏈。唔少國家雖然疫情唔嚴重,都要面對無貨到嘅危機,真正體驗到何謂全球化經濟,掀一髮動全身!連美國股票市場都因為多項不穩定因素大跌。講到股票同疫情,香港以往都有過慘痛經驗,相信唔會有人想再經歷第2次。

今日想同大家重溫西片《孖展風雲》。電影只係喺辦公室取景,無千億電腦特效,不過好劇本加上一眾好戲之人,令呢部電影無槍林彈雨、群車追逐,卻依然緊湊,仲有幾分心寒添。《孖》借鏡雷曼兄弟事件,講述2008年金融海嘯爆發前夕,一間投資公司於二十四小時內如何應對投資失誤,令公司力保不失。

風險管理員艾力(史丹利杜斯 飾)在進行資料搜集期間,無意中發現公司即將陷入金融危險的驚人真相,卻在重要關頭被公司無情解僱,只好將手上資料交給初級分析員彼得 (沙查昆圖 飾)跟進。彼得接手後發現公司的證劵勢將爆煲,事件迅速驚動公司高層,漏夜趕回會議室召開閉門緊急會議,在開市前夕商討對策。

戲中各人職責分明,亦道出金融投行行業收入豐厚同時亦相當無情。好似交易中心主管森(奇雲史柏西 飾)及忠心副手偉利 (保羅班特尼 飾),一邊大裁員一邊又要以「阻住你上位嘅人已被炒」嚟振奮士氣,同時又要指示員工以最短時間將壞債劵拋售; 金融事務專員莎拉(狄美摩亞 飾)明明唔係壞賬元兇卻被公司擺上枱祭旗。早已見慣行業操作嘅佢只關心有幾多「分手費」!

最正係老細級高層,坐得高唔等如識得多。初級分析員彼得攞哂數據解釋公司有幾大鑊,結果個個一睇到大數據分析即刻走夾唔抖,企業總裁杜約翰 (謝洛美艾朗斯 飾)仲明言佢坐到上呢個位,唔係因為佢聰明,只係佢睇得比別人通透同遠,所以同佢講數據時,要當同細路講,簡單易明!唔識睇數據,一樣大賺特賺,你負資產時佢花紅仲分大份咗!

電影結尾公司無事保得住,不過引發金融風暴,通街都係苦主,而森亦表明唔會離開騙盡投資者、小市民嘅投行,因為佢仲需要錢!

心寒唔一定同殺人、打鬥有關,明知會害多人血本無歸,仍然以自己利益行先,食人血饅頭,咁先最恐怖。