【外語930】《向政府說不》 我地真係得!

區選令18區變色,黃色全面進場,投票率仲破晒紀錄超過7成,有評論話係對政府嘅一次表態。不過區選唔係公投,有代表性但唔代表迫到特首要以行動回應。

講選戰嘅國際電影好多(華文影壇就……),荷里活更加盛產呢類片種,但係2012年智利片《向政府說不》(NO)先係心頭好 。故事背景設於上世紀80年代,當時智利由獨裁者皮諾切特執政,實行鐵腕統治,上屆大選以「球證旁證足協足總足委全部都係我嘅人」咁嘅形勢下進行,皮諾切特再做8年,當時佢話由公投決定,國民俾唔俾佢做多8年。1988年,就係公投嘅一年。

當時國際勢力令皮諾切特要俾支持(YES)同反對(NO)陣營有同等電視廣告宣傳時間。《向》嘅主線就係講Gael García Bernal 飾演嘅廣告人Rene,要為處於弱勢嘅反對陣營度橋拍片,即係而家所講嘅︰文宣。

Rene力排眾議,唔sell悲情、被打壓,用商品廣告手法包裝政治訊息,將NO字標誌配止彩虹、廣告歌夠搶耳又入腦,成條廣告片展現民主帶來嘅光明,就連演員都用手勢動作(擰頭、fing手指)表達NO嘅反對意味。(想睇返當年真實版廣告可以上youtube search “chile happiness is coming”)

當年冇得用Telegram,Rene嘅身份當然俾人知道,梗係被人騷擾。而佢老細就係YES陣營嘅大腦,一心想上位,更加令Rene呢場仗連個人層面都牽涉埋。最終,選擇NO嘅佔大多數,皮諾切特下台,出乎所有人意料。

投票嘅始終係國民,點先打動佢地支持自己陣營?民生、民心當然緊要,但係文宣都要學Rene所講「好切合現今社會」先得。我好希望度橋同埋扑鎚俾「與暴力割席」條政府廣告出街嗰幾位,有時間睇睇呢套戲。