【外語930】動物識講嘢 唔止D老篤 《精裝群獸追女仔》

今個農曆年西片有Ironman 羅拔唐尼主演嘅家庭喜劇《怪醫D老篤》。故事係翻拍作品,橋唔係新不過有齊探險、刺激、喜劇、擬人識講嘢嘅動物,加上係羅拔唐尼離開漫威宇宙後首部作品,電影公司當然不敢怠慢,落足本做宣傳,實行將普通合家歡當成超級英雄片咁煲!羅拔唐尼無咗Ironman盔甲護身仲保唔保持到叫座力好快就知,今日同大家睇返套動物講人話嘅舊片《精裝群獸追女仔》(Zookeeper)。

《精》於2011年上映,由笑匠Adam Sandler監制,搵嚟佢《中坑同學會》、《逼上斷背山》銀幕拍檔Kevin James做男主角。故事講述肥仔動物園管理員傑芬(Kevin James 飾)心地善良,備受動物愛戴……除了女性之外。愛過華麗生活的女友離他而去,他相信要挽回這段感情,唯有另謀高就多見世面。

動物園內一眾動物為咗幫傑芬追返女友,決定公開隱藏多年的秘技︰講人話!群獸開金口,皆因要教傑芬用動物天賦本能追女仔,希望留住女神後留得住傑芬。為咗教佢溝女十式,群獸各出奇謀,黑猩猩直頭著件衫變身gentleman帶傑芬食飯去date!結局當然係大團圓,真命天女唔係拜金前女友而係一直喺傑芬身邊嘅獸醫保育員Kate(Rosario Dawson飾)!

雖然同為動物講人話電影,不過《精》嘅宣傳力度及票房同《怪醫D老篤》差天共地,最大原因當然同男主角有關係。雖然幫《精》班動物配音嘅大有來頭,有天后雪兒、史太龍分別幫獅子Janet及Joe配音,Adam Sandler自己無露面,不過幫好重戲份嘅馬騮仔Donald配音,單睇cast其實一啲都唔弱,可惜見唔到樣嘅演出,星光即時減半!

而掛帥嘅Kevin James於香港知名度一般,雖然2000年中期,Adam Sandler嘅電影《愛情大龍鳳》、《每天愛你第一次》等大收旺場,《精》全片亦充滿Adam Sandler式笑話,但始終唔係由Adam Sandler主演,效果差一截!事隔多年,因為串流平台崛起嘅關係,觀眾口味亦有所改變,睇星緊要,睇橋更重要。新年想安坐家中睇套輕鬆笑片,不妨搵返《精裝群獸追女仔》出嚟睇!